اللجان الشعبية

الصوره كانت مُبْهِره


يوم الخميس


يوم ما نِزل باقي الشباب


يحمي الشوارع م اللي سمُّوهم لصوص


يحمي البيوت


يحمي بنوك فيها الفلوس


وقف الشباب


على كل باب


لما هرب كل البوليس


ماسك ف إيدُه أي شيء


شومه .. عصايه .. مسطره


أو حتى طوبه صغـَيَّره


.............


الصوره كانت مُبْهِره


ومُعَبِّره


الزوجه والأم وبنات


وولاد صُغار متألـِّمه


رافعين إيديهم للسما


بالهمهمه


ويقولوا من قلب انكـَسَر


يا رب مصر


..............


الصوره كانت مُبْهِره


كانت حقيقي مَفـْخـَره


الناس قلوبها ع البلد


لكنها مِستنظره


جيل م الشباب فجأه اتوَلـَد


واجـِه جحافِل في الميدان


لكنْ صَمَد


واخواته قـُدَّام البيبان


كانوم سَنـَد


والأهل من بين الحيطان


بتقول أحد


أحدٌ أحدْ


..................


الصوره كانت مُبهِره


ومِتـْعَطـَّرَه


بعرق شباب مِتـْجَمْهَرَه


من غير خطط مِتـْحَضـَّرَه


وقفت تنادي في الميدان


وبصوت هدير هز المكان


جلجـِل قلب كل اللي كان


خلـَّى السحاب كله انقشع


والشمس تتحرر ، تبان


والصوت لقى ودان ينسمع


والمُجرمين والمُفـْسِدين


وكتير من القـُطط السِمان


حاولِت تزوَّغ منْ وَرَا


بس الطوفان


غطـَّى المكان


خلاها تـُقـْعَد مُجْبَرَه


تستنى من عدْل الزمان


أقصى عِقاب ع اللي جَرَى


................


الصوره كانت مُبْهِرَه


فيها شباب متحرره


لقيُّوا ف نفوسهُم مَقـْدِرَه


يتجَمَّعُوا


ويكونوا سواطير مُشـْهَرَه


في وجه طُغـْيان الزمان


في وجه صُنـَّاع لامتِهـَان


في وجه أتباع الشِيطان


لكنها وبصبرها


قدرت تهز الصولجان


.............


الصوره كانت مُبْهِرَه


منها نـُسَخ مِتـْكـَرَرَه


موجوده في كل البلاد


فيها شباب من نفـُسُهُم


وبحِسُهُم


من كل أطياف العِباد


إتجمهروا من غير ميعاد


رغم انهم كانوم بُعاد


عن بعضـُهُم


لكنـُّهم


دايما عددهُم ف ازدياد


وقفوا يواجهوا قـَهْر زاد


وقفوا يقولوا ألف لا


للي باعوهم بالمزاد


واللي اشتراهم منـُّهـُم


يرسي عليه برُخـْص التـُراب


والسلعه كانت نفسها


هُمَّا الشباب


................


الصوره كانت مُبْهـِرَه


فيها المشاعر تِنقـَرا


من شعب مصر


وجيش عظيم بيأمِّنـُه


والحب ما بينهُم قدَر


جيش لما حارب في الميدان


حارب عشان مصر الأمان


ما خزلشي شعبُه وانتصَر


لكننا بصرف النظر


شفنا النهارده جيش حكيم


بيرُد عن شعبُه الخـَطـَر


قاعِد ومستني الشباب


يُعْبُر من المِحنه بشجاعه


زي ما جيشه عبر


يمكن صحيح بتاريخ قديم


لكنْ بدرْس وفيه عِبَر


...............


الصوره كانت مُبْهِره


الدنيا فيها منوَّرَه


فيها الحقوق بدإت تعود


رغم انها جت بالوعود


لكنْ وبشهادة الشهوُد


وبروح شباب هد السدود


قلبُه عِرف معنى الصمود


وقدر يكون هوَّا الضـَمَان


قال مصر مش ممكن تعود


تاني بدون ميثاق يسوُد


مِتظبَّطه فيه البنود


تضمن حقوق ملهاش حدود


للشعب ويصون الأمان


.................


الصوره كانت مُبْهِرَه


وهتبقى بُكره منوَّره


لما الشباب يبني الأمل


بالجهد والروح والعمل


يبني هَرَم مُسْتـَقبلـُه


بعد اما تحريرُه اكتـَمَل


يبني المصانع والسدود


يحمي البلاد عند الحدود


والإنتصار دا يكـَمِّلـُه


يفرش طريقه بالورود


ويرَبِّي إبنه على الجهاد


علشان يكون كل الولاد


للظلم مش مستسلمه


ويصونوا أمجاد البلاد


وبدون أمور المنظره


وبدون وجوه مِتزوَّره


وبدون قضايا مُبْهـَمَه


الصوره تفضل مُبهِرَه