الموتــــــي ( صلاح جاهيــن )

فاطمة فيصل كتب:قصيدة "الموتي " آخر شعر كتبه صلاح جاهين , وكان علي درجة عالية من الشفافية فيها حين قال : حبايبنا ياغاليين ماأحناش ح نتأخر وقد كتبت في مايو 1983 في أجواء رحيل " أمل دنجل" , ورغم أن الشاعرين قد رحلا فإن هذه القصيدة شديدة الحيا’ , خاصة في هذه الأيام .
" أدب "

في صفحة الموتي
بيكلموني كل يوم الصبح
بصورهم الباهتة
بعيونهم الثابتة
بيسألوني كلهم إمتي
ح تنطبع صورتك كمان
انتـا ..
هنا زينا في صفحة الموتي ؟

حبايبنا يا غاليين
ماحناش ح نتأخر
الدور ح ييجي والمصير محتوم
ياللي صورتها بطرحة الزفة
ده حكم من قبل الوجود محكوم
يا اتنين عجايز : حاج , ومقدس
صورتين بلاسة والجبين مهموم
يا مغترب
يا صورة طالعة من جواز السفـر
يا رسم علي وش التابوت مرسوم
في حفاير الفيوم...

وحفاير الفيوم
جبانة من الزمن العتيق
مشهورة بالصناديق
وعليها بالألوان صور مخاليق
كاهن .. مراكبي .. ست بيت ..تاجر ..
بنية حلوة .. عسكري .. شاعر ..
صور بشر ايامهم انحسرت
مداينهم اندثرت
توابيتهم انكسرت ..
ما فضلش منها غير وشوش
بيبصوا نفس البصة
وبيحكوا نفس القصة
مستغرقين في الموت بلا غصة
وفي الخلود رايحين ..
زي اللي في الجرنال
في صفحة الموتي
قلت الشبه من أين يتأتي ؟
قالوا عشان الكل مصريين

الكل مصريين
الكل نفس الهويه
نعي المطارنة جنب نعي الشيوخ
طالبين سوا أمجاد سماوية
في وحدة أبدية
ما تعرف الطايفة المسيحية
من الأسلامية..
تشهد صورهم جنب بعضيهم
في الأعمدة السودة البكائية
بإن دي .. هيـا ديا .

بأحكي عن الموتي وملك الموت
يحصد أمم ويدري في الملكوت
يقعوا كندف الثلج
غير مسموعين
أو كالجبال يقعوا بأرعبها صوت
بأحكي عن الموتيفي شتي العصور
وبأقول عليهم ألف رحمة ونور
مش باحكي أبدا عن أمل دنقـل
لأنه عايش رغم سكطنـي القبور

وقالوا في الأمثال ..
اللي خلف ما متش
وعن أمل يتقال ..
اللي ألف ما متش

وسلام علي اللي في صفحة الموتي
وسلام علي اللي في صفحة الأحياء