منتدى المطرية منتدى السحر والجمال

آآنا هنا فى منتدى
المطرية موجود
ماذا هنا دنيا
الخلوب
تثير أهواء
القلوب
صدحت بقلبى
حين دخلته
انغام سواحر
فكأنما فى قلبى
المأخوذ غنى
الف طائر
تلفتت عيناى
فى دهش
وفى لهف غريب
فى كل موضوع
حروف رقصت
رقص عجيب
اعضائه نجوم
احس لهم الحانا
شجية
مشرفيهم سحاب
اخاله تحدوهم
موسيقية
خفيه
داعبت روحى
روحهم
ورفرفت روحى
حولهم
ان اجمعوا على
بيان
اضمه قلبا وعين
اليوم فى حلم انا
ام يقظة بين بين

الأخ الكريم \ الشاعر محمود رشوان

بوجودك زاد المنتدي بهجه ونشاط .
فالشعر كان لاوجود له بالمنتدي .
فهنيئا لنا بك و بالشعر الجميل .

أختك \ فاطمة فيصل

الأخ الكريم \ الشاعر محمود رشوان ارسلت لك رسالة خاصة ارحو ان تقرأها وترد عليها

الاستاذ / محمود رشوان 00
اهلا بك بالمنتدى وهنيئا لنا بوجود شاعر بيننا ودائما فى انتظار المزيد 00
وسؤالى هل انت عضو بالنادى ام من اهالى المطرية فقط 00
مره اخرى مرحبا بك 00
م / محمد صلاح الدين طنطاوى

أشكر كل من رحب بالأستاذ محمود رشوان
وكما قلت من قبل فهو عم زوجتي ومن أهالي الجمالية وفيصل والمهندسين وكان في زيارة لي وعرفته على المنتدي وعجبه كثيراً جداً
وهو إنسان خلوق ويعشق الشعر وله كتابات كثيرة
وإن شاء الله سوف يساهم بمجموعة كبيرة من الأشعار
ويارب تعجبكم

آهلا بيك أهلا يا سيدي
آهلا بيك شرفتني
أنده عليك على طول تيجي
وبكره برده مستني تيجي
واستني كده سؤال مني
ولو مسألتش أسأل أنتي عني

ومتحرمناش كده منك
مع أن أحسن البعد عنك

م/ أحمد الحريف

جريت أهرب من الأيام
من الماضي
من الآلام
من الناس اللي ساجناني
ف زنزانه بْسلاسل حُزن ألماني
وتهماني
بإني قتلت مجدي ومجد أوطاني
وخليتني أنا المسؤول
عن النكسات
وإني مشيت مع مظاهرات
وإني مقاطِع انتخابات
بحس بإنها زايفه
وإني قفلت وجداني
على إحساس كئيب جاني
ف عيون خايفه
وخليتني في نفس الوقت
انا المقتول وانا الجاني
وانا م التـُهْمه دي مظلوم
عشان محروم
من اللقمه اللي ذلاني
وصوتي ضاع ف وسط القوم
ويمكن جوَّا حلقي مات
لأني جيت أحاول ازوم
ما طلعت مني غير أنات
.................
صحيت مره وانا مقهور
ف زنزانه ما فيها شرخ
يبعتلي شعاعة نور
وف الضلمه حاولت أسير
ومقدرتش
لقيت نفسي ف مكاني بادُور
وف الضلمه عيون تانيه محوطاني
كأن الحته فيها نمور
وشايفاني
قدرت اهرب في غمضة عين
وسبت ورايا عمر سنين
لقيت نفسي ف وسط مكان
لا فيه كائن ولا إنسان
بقيت وسط السكون تايه
وفجأه بان
وحوش وغيلان
رموني جوَّ بير فاضي
لكنه بان كأنه ملان
وناس واقفه
وشايفاهُم
ولكن عامله مش شايفه
كأن اللي اترمى في البير
ماهوش كائن ولا إنسان
لقيت نفسي
ما بين يأسي
وبين شعرة أمل .. حيران
وم الحاضر ملاني الخوف
غرقت ف حيرتي وف خوفي
مع شوية وجوه بتطوُف
مانيش عارف إذا كانت
وجوه تانيه وأمل تاني
أو الحاضر بعت مرسال
يزيح بؤسي وحرماني
وينشلني من الماضي
يخليني أكون راضي
وينسج ليَّا عمر جديد
مفيش فيه ماضي .. فيه بُكره
وأبدأ زي طفل وليد
ما يعرف شيء عن الذكرى
كتاب أبيض وبال فاضي
ومستقبل ماهوش عادي
شموعه بالسعادة تقيد
وأبني الدار مع ولادي
يكون فيه الأساس راسخ
يتيح الأمن لاحفادي
ونرفع من فوقيه صاري
يرفرف فيه علم شامخ
وفي الساحه منار قايد
ينوَّرلي الطريق قـُدَّام
على نوره نقوم نمشي
ولا نخافشي
من الأيام

ما الموضوع ياخواتى بالمنتدى 00 مره واحده نرزق بشاعرين 00 عموما اهلا بصحوه الشعراء ويارب بلاقى نماذج فى مجالات اخرى 00
الاستاذ فهد تيتو 00 قصيده جميله وتعبر عن حال الكثيرين 00 اهلا بك شاعرا وفى أنتظار المزيد 00
اما المهندس احمد الحريف وعائلته فنحن فى انتظار باقى الافراد لنتعرف على باقى التخصصات 00
00 م / محمد صلاح الدين طنطاوى

حبيبي قلبي طنطاوي

مش عارف أقولك أيه
أنا من أشد المعجبين بذوقك وأدبك ومجاملاتك الرقيقة والجميلة
حضرتك وكل الأعضاء المحترمين والمقربين على قلبي
وبصراحة أنا بهدي محمود توتو للمنتدي لأني عارف أنه شاعر جميل
وعن قريب سوف أحضره معي في نادي المطرية

وعلي فكرة محمود رشوان (توتو) فنان ويجيد الرسم أيضاً

فلننتظر إن شاء الله المزيد

أخيكم
م/ أحمد الحريف

الأخ العزيز فهد تيتو

كلمات جميلة ولكن فيها يأس وشجن كثير

أنا با أقول كده علشان سنك صغير على هذه الأشجان
وربنا يوفقك في حياتك
وننتظر منك المزيد
وساهم كده في حاجة بها المرح والسعادة
وبالتوفيق إن شاء الله

أخيكم
م/ أحمد الحريف

صورنا زمان ابيض واسود
بتلون عينا بذكرى ماتعرفش الاحماض
نفضل نتخانق
مين فينا يحافظ على الصورة من غير تقطيع
نفضل نضحك
على طول الشعر وتسريحته
على معنى بيهرب من البصة
على جرح فى ركبة وعوجة ايد
نكبر والصورة بتتمرجح على حلم بعيد
نسأل روحنا
اديتك ايه
يا ملامح وش
يا بريئه بحق
اديتك اوقات مكفية على كنت وكنت
اديتك حزنى المتكعبل فى وشوش الاهل
اديتك صوت
بيحل ويربط قلق المعرفة والصمت
اديتك ضحكة بتتأخر من خجل البنت
وبتصنع علاقات مفهومة
مفارقها الفهم
ووشوش اصحابنا اللى بتكبر
من غير مانحس
وتوتر ملامحنا التاية فى قبول او رفض
ابيض واسود ...
كان زمن الصورة المتاخده للوش البكر
فهد تيتو
fahdteto20012001@yahoo.com

الأخ الكريم \ فهد تيتو

بارك الله فيك . كلمات جميله تعبر عن الزمن الجميل .

ربنا يوفقك ونريد منك المزيد .

فاطمة فيصل