كلمتين محشورين في زوري

نهى خالد

كلمتين محشورين في زوري: لو كان صباحي ولا البرادعي هو اللي أقال طنطاوي وعنان و70 من القيادات العسكرية وأفرج عن ضباط 8 إبريل وراح الصين وإيران وقال اللي مرُسي قاله في قمة عدم الانحياز كانت الناس عملت فرح بلدي في الشارع ... لكن عشان مُرسي الإخوان الكُخة ... يبقى نقعد نفرك ونهرش في دماغنا وندورله على غلطة ... ونس
يب ده كله
ونشير كلام لداعية مش عارف مين بيقول تصريح أهبل مقالوش أساساً ونلبسها
في التيار الإسلامي كله وبعدين نلقحها على مُرسي ... أي هبل في الحِلَل!

مُرسي الآن أفضل مما توقعنا في الملفات الاستراتيجية (علاقات خارجية وعلاقات مع العسكر) ... والناس اللي هتموت عشان تعيد الانتخابات وهيطقلها عِرق وتاخد كُرسي الرياسة لفة ... نحب نقولها إن لو مُرسي نزل انتخابات بُكرة هياخد بالميت 60% ... عشان مُرسي امبارح كان الراجل اللي بيتكلم وحش ومعندوش كاريزما ... لكن مُرسي انهاردة الراجل اللي زحلق عنان وبيطهّر المؤسسة العسكرية وبيروح طهران وبكين وبيناصر الثورات علناً

كونوا منصفين يرحمكم الله ... حتى الآن ما قدمه الرجل أكبر وأهم وأكثر من الأخطاء التي ارتكبها والتي لم ولن ننسى منها أول ما تمخّض عن رؤيته الاقتصادية وهي القرض من البنك الدولي ... وملحوظة على الهامش ... أي تيار يميني في أي بلد بيمارس نفس السياسات الاقتصادية ... يعني هذه السياسات تدعو للمعارضة وبناء بدائل في إطار الديمقراطية ... ولكنها ليست سياسات تُقام ضدها ثورات ويُطالب لأجلها بإزاحة الرئيس ... ابنوا يسار عِدل في الشارع واكسبوا مصداقية وأصوات عشان تقعّدوا المرة الجاية واحد يساري ع الكرسي ميمارسش نفس السياسات ... بدل العويل والشتيمة في الشارع!

ابنوا بدائل ... وبعدين تعالوا اتكلموا ... لكن مش كل واحد مش عاجباه فسفوسة يلم أصحابه وينزلوا يسبّوا في الشارع في الإخوان ... وانت عملت إيه حضرتك! ... عرفت تكلم الناس؟ بنيت قواعد شعبية؟ عرفت حتى تقلد الإخوان في تنظيمهم؟ يا آخي حتى وزّع زيت وسكر زيهم! ولا هي عشان الشتيمة سهلة فنلم سوسو ولولو وننزل طلعت حرب!

ابنوا قبل أن تعارضوا ... وعارضوا بشرف ... وبأمانة ... وبإنصاف ... وطهّروا ألسنتكم ... آه ... طهروا ألسنتكم ... عشان كتير جداً من المعارضين لسانهم ... أستغفر الله العظيم ... والأخلاق لا تنفصل عن أي حاجة ... واللي هيقولي مفيش أخلاق في السياسة هابطحه!