المجلس الاعلى

المجلس الأعلـــى
ــــــــــــــــــــــــــــــ





يا حامي ثورتنا .... يا المجلس الأعلى



زوِّدت قـُدرتنــا .... وبقينا بيك نِعْلـــَىَ



نـوَّرت مادنِتنا .... بفانوس وفيه شـُعله



فلقينــا سكـِّتنا .... واضحه وزى الفـُل



ــــــــــــــــــ



لمـَّا نِزلت الأرض .... في دايرة الميدان



إنت التزمت بعهد .... بنزاهــة الفرسان



ما سِبْت فينا حَد ... إلا اما كان مِنصان



وكنت أبلـــغ رد .... ع الريِّس المُنـْحَل



ــــــــــــــــــ



شايل هموم الناس .... نفسك قوام تِنزاح



أوِّلهُــم الإفـــلاس .... سَبِّب ألام وجراح



وتانيهم الإحساس .. من ظلم طاغي وراح



والتالته نَهََب الناس ... وفرَض عليها الذل



ـــــــــــــــــ



كان عهد أو ميثاق .... شِلـْتـُه على اكتافك



عدِّلت في الميثاق .... والشعب جه وشافك



والكل قال محْلاك .... مشهود بإنصافــك



رب العِباد خلاك .... حارس أمين ع الكل



ـــــــــــــــــ



مِنـَّك أخدنا الوعد .... تِحْمي الأمور كام شهر



وتصون خطوط الحد .... والميه جوَّه النهــر



ولحد مانجيب حـــــد .... بالانتخــــاب الحُر



يبقى رئيسنا بجد .... وماهوش خيال للضِل



ــــــــــــــــــ



وانت أمانه عليك .... يا مجلس الأبطـــــال



تحفظ ثقتنـا فيـك .... تبقىَ ورا البطـَّـــــــال



دا احنا أملنا فيك .... تقضِي علــى الأندال



بمُبيد شديد وفنيك ... أو كيْرُوسين من شِل



ـــــــــــــــــ



لكن أنا خايِّــــف .... من فتنه وطنيَّــــــــه



وانا كل يوم شايِّف .... عفريت وجنيَّــــــه



وشِيطان كمان لايِّف .. على ناس مهيش هيَّه



وبقى الجميع عارف .... إن الخراب هيحِل



ــــــــــــــــــ



شوفوا اللي في الشارع ... بيهاجم الماشيين



أو بلطجي وضايِّع .... طافِش مع الطافشين



أو مُغتصِب ضالِع .... يخطف بنات تايهين



والكـُـل بيصارع .... في المجرم المُختـَــل



ــــــــــــــــــ



دا كلـُّه بيســـاهِم .... في نكبة الغلبــــــــان



يعني الخطر داهِم .. عاوز شباب شـُجعان



زي اللي كان نايِّم .... بالشهر في الميـدان



هوَّ اللي هيقاوِّم .... والأمن بيه هيطـُـــــل



ــــــــــــــــ



عاوزين بوليس يرجع .... يحفظ أمان بيتنا



عُنصُر مفيد ينفـَـــع .... في الأزمه ويغيتنا



وان حد قــــــام فرقع .... قاصِِـــــد يفتـِّتـنا



سوط البوليس يوجع .... ويلسوَّع المُنـْحَل



ــــــــــــــــــ



ومعاه بوليس حربي .... هيعاونـُه بسلاحُه



وان عازنا هنلبِّي .... ونساعدُه ف كفاحُــه



لكن ومن قلبــي .... همْسَح علــى جراحُـه



وبحُبُّـه وبْحُبِّـــــــي .... تِبقى العلاقـــه فـُل