رسالة لاخى الغالى احمد الحريف

اخى الغالى : احمد الحريف
اهديك سلامى من اطهر بقاع الارض مكة المكرمة وقلبى وعقلى ودمى وكيانى معكم فى مصر اننى اسف جدا لاننى لم اوفى بالوعد فى عدم كتابتى باى قصيدة سياسية او وطنية لكن يا اخى ان الظروف التى تمر بها مصرنا الحبيبة لابد ان تجعل الحجر والصخر يصرخ ويتكلم فتقبل اسفى وعذرى واهديك قصيدتى
بالسياسة بالسياسـة خد أمورك بالسياســة
بالفراسة والكياسـة بس إيه هيه السياسـة؟؟
* * * *
السياسة إننا مانقولش... لأ....
أو نخاف ننطق بكلمة فيها حق
أو نخاف عقرب بيسكن جوه شق
أو نقول الخير ف بلدي للخلاصة........ تبقى دي هيه السياسة
* * * *
السياسة إن قلمي ويا حلمي ينكسر وف يوم يمـوت
أو مايطــــلع منا شهـــقة ولا صـــوت
أو نشــيّد كل ســيّد واحنا ماضغين السكـوت
أو نقول ع الفالصـو ماســة..........تبقى دي هيه السياسة
* * * *
السياسة إننا نربط حمــــار
ف المكان اللي ح يعجب الكبار
وان ف مرة إعترضنا ع القرار
تبقى دي بعينها الغلاســـة..........تبقىدي هيه السياسة
* * * *
السياسة إننا نحيا ف بيــــر
أو نعلي سـقـفة للبيه الـوزير
أو نطاطي البصلة ونخاف المصير
وطي واحني كل راســـة..........هيه دي كل السياسة !!!!!!!