مقالة نارية للفنانة اسعاد يونس ايه رأى الرجالة الاخوان

مصر بوك | Egypt Book
كلام قوي جدااااااا


حسبنا الله ونعم الوكيل

بقلم إسعاد يونس ٣/ ٢/ ٢٠١٢

هو مين حسنى مبارك ده؟؟.. ومين صفوت الشريف؟؟.. ومين عز ومين وز ومين ومين.. مين دول قدام شعب مصر ومستقبلها وأمانها؟؟.. مين الشلة الموضوعة فى كفة والبلد فى الكفة التانية؟؟.. مين ده اللى بيتنقل فى طيارة ممنوع تصويرها وسيارة إسعاف بتعمل أربع مشاوير فى الجلسة الواحدة واحنا بنكاكى على ما يسأل فى أهالينا استقبال طوارئ فى مستشفى ولاَّ مستوصف.. مين السجناء دول اللى كل سجين مصروفله عربية لوحده يروح بيها السجن ويرجع بيها.. مين اللى محاكماتهم محظور نشرها ولا احنا عارفين تطوراتها إيه وقاعدين نضرب أخماس فى أسداس؟؟.. فين محاكمة موقعة الجمل؟؟..
مين المدام اللى مسرّحة شوية ناس ولاؤهم ليها بحكم المستندات والأفلام المتصورة فى غرف النوم والتواليتات ووصولات الأمانة وتحويلات البنوك والعك الأزلى اللى كان واخد براحه فى البلد دى.. فين الباشا صفوت الشريف؟؟.. متنيل متشال على جنب ليه وفين محاكماته وإيه أخباره؟؟.. إشمعنى يوسف بطرس غالى ينطس تلاتين سنة سجن فى قضية نمر عربيات واللى خربوها ومازالوا يخربونها قاعدين منعمين يحصلون على رعاية وحماية لم يحصل عليها لا أعظم الشرفاء ولا أعتى المجرمين.. إيه الليلة السودة دى؟؟.. بتحموهم من مين؟؟.. من الشعب؟؟.. وهل الثمن يساوى انقلاب الشعب عليكم؟؟.. وهل الشعب يقاس بأى ثمن فى الدنيا؟؟

■ انتوا عايزين إيه مننا بالظبط؟؟.. أنتم.. نعم أنتم.. جنرالات المجلس العسكرى.. ماذا تريدون من شعب مصر بالتحديد؟؟.. أنا التى أسأل.. أنا المواطنة البسيطة التى طالما عبرت عن جل احترامها للمجلس الأعلى للقوات المسلحة الباسلة.. هكذا كنت أناديه وأصر على عدم توجيه أى اتهامات أو إهانات له وكنت أستكبرها جدا بحكم نشأتى وتربيتى.. وتحملت من أجل ذلك كل السباب والتحقير وسب الدين كأننى عميلة للمجلس أو بقبض منه تمن ولاء زى المفخّد اللى بيقبضه بعضهم.. وأنا الآن التى أسأل وغيرى ملايين.. وآخرتها؟؟؟؟؟؟؟؟؟؟!!

■ المصيبة أننا أشرنا ونبهنا من قبل آلاف المرات.. ليس بصفتنا أذكياء بنلقطها وهى طايرة، لكن بصفتنا أغبياء وجهلة ومخنا قد النملة.. قلنا إن الكتالوج قديم بالى رث.. وإن كل خطة يتم وضعها لإشاعة الفوضى وخلق الفزّاعات وإرهاب الناس مكشوفة وقديمة وبلدى وناشعة مية معطنة.. فما بالكم بالأذكياء بقى.. وقد يطالبكم البعض بالابتكار والتجديد عشان تخيل علينا حتى.. طب وإيه رأيكم لو من الأول كنا حطينا مصلحة الشعب فى المقدمة.. مش كان يبقى أسهل وأأمن وأشرف وكل المعانى؟؟

■ يا عالم طلع أيمان أبونا تدبيرات ومؤامرات وتخطيطات وتربيطات.. والله قرفنا.. من أول موقعة الجمل واحنا بنتربط فى ساقية مغمضين وبنلف زى الجاموس حوالين علامات الاستفهام الضخمة التى تلتهمنا وتكاد تأتى على آخر ما كنا نؤمن به فى هذا الوطن.. من ساعة فتح السجون وطلق المجرمين علينا.. إلى مهزلة اقتحامات أمن الدولة.. مرورا بحرق الكنائس وتصدير بشر ليست لهم أى صلاحيات ليسيطروا على الجموع، كأنكم تفتقدون أى أهلية أو سلطة أو قوة.. ولا هدوا ولا سيطروا ولا نيلة لكن فاحت رائحة التربيطة والاتفاق فقط.. بدليل استمرار قطع الطريق والإضرابات المجنونة إلى الآن.. وفى السكة تأتى موجات منظمة للبلطجة غير مسبوقة وغير مفهومة ولا تنتمى لسلوك الشعب من أصله.. وشوية حوادث خطف تظهر فيها قوة الداخلية ظهورا مؤقتا ثم فس.. وخد عندك محاكمات عسكرية للمدنيين وخصوصا الثوار.. وعالم بتختفى بالشهور مش عارفين محبوسين فى أنهى داهية.. وأهالى بتتلطم.. ومشكلة شهدا لا تحل بل وتضاف إلى أعدادهم أعداد أخرى.. من أول يوم العيد الصغير وتفضية ميدان التحرير إلى الآن.. مرورا بكل جرائم الميدان ومحمد محمود ومجلس الوزراء.. واصطياد الثوار بعينهم لاغتيالهم.. وطلق جحافل حيوانات مدربة تتصور بالقصد أمام الكاميرات وهى تحرق المنشآت.. وحملة منظمة لبث الكراهية فى الثورة وشبابها.. وتجنيد ناس لهذا الغرض للأسف عرة ويكسفوا فتكون النتائج هزلية ومؤسفة وأكثر ضحالة وخيابة.. وفى النص بقى استفتاء عبيط تنزف فيه الدولة مليارات ويبوظ.. وتعديلات دستوريه فياسكو.. وجيم طويل عريض ولا أجدع جيم بلاى ستيشن على كراسى البرلمان والانتخابات واللى فى القلب فى القلب بقى.. وحتى بعد نجاح التربيطات وتقسيم الفخدة.. تظهر على السطح أشياء مريبة كأن يتم توقيع قانون الانتخابات الرئاسية قبل انعقاد البرلمان الأول بأربعة أيام دون إخبار أحد.. فيقول الناس هما وقعوا فى بعض ولاَّ إيه؟؟..

■ ثم عندما يظهر وزير داخلية فيه الرمق.. تتزامن معه المطالبة بتسليم السلطة والرحيل.. فتتم التضحية به واغتياله معنويا فى شكل انفلات أمنى مصطنع ومكثف.. وإلا.. إيه سر اليونيفورم الموحد الذى يخرج به المجرمون للسطو المسلح ده؟؟ كلهم لابسين جلابية وجاكتة ومتلتمين تلتيمة عربى!!.. مين اللى بيكتب الرسائل العبيطة دى؟؟.. وأخيرا مأساة بورسعيد التى تفوح وتزكم الأنوف رائحة التخلى والخيابة والإهمال منها.. وأقول أخيرا بفعل أنها حدثت ليلة الخميس وأنا جالسة أكتب المقال وأنزف من قلبى وعقلى.. العالم الله أصبح أنا وأهل بلدى نلاقى إيه جد بكرة الصبح.. ٧٣ قتيلاً وألف جريح!!.. ضربة معلم.. مناخ مناسب لتاريخ ملبش بين الأهلى والمصرى.. وفتيل متين.. وموقعة جديدة تضم لسجل المآسى.

■ كووووووووول ده من أجل عيون اللطخ المخلوع ده.. اللطخ اللى ضيع البلد على مدى ثلاثين عاما هو وألاضيشه!!.. أهكذا تزنون الشعب يا سادة؟؟.. الشعب الذى منه أولادكم وأحفادكم وقرايبكم.. والهدف إيه؟؟.. آخرتها يعنى.. إننا نستسلم ونقول خلاص عفا الله عما سلف وأبوك عند أخوك وصافى يالبن؟!.. أظن أنه بعد كل هذه المعاناة معنا.. اتضح لكم أننا لا نسلم.. وأنه حدثت ثورة.. وأنتم اعترفتم بها وبشرعيتها.. وأنكم من أضعتم كل هذا الوقت وأطلقتم علينا من أشاع الأفكار الغريبة والتصريحات الهطلة التى خربت بيتنا جميعا.. وأن حساباتكم دائما قاصرة.. فكل مرة تعتقدون أننا متنا وجيم أوفر تفاجأون بالعكس.. وأنه قد بلغ منا القرف مداه..
عسى الرسالة تصل هذه المرة.. حسبى الله ونعم الوكيل والمجد لشهدائنا.
Like · · Share · 4 hours ago

وهذا رأى الاستاذ/عبد الرحمن عكيلة:-

R.N.N | شبكة رصد
عبد الرحمن عكيلة يكتب| لم يعد يجدي الكلام

لم يعد يجدي الكلام ,, لم يعد يجدي نفعا دفن الرؤوس فى الرمال كالنعام , فمن لا يعرف ويعترف فى قرارة نفسه أن المجلس العسكري بقيادة المشير طنطاوي مسئول مسؤلية كاملة عن كل المصائب التي حدثت فى مصر بعد تنحى المخلوع – اما أنه جاهل أو أنه يتغابى و يتغاضى عما يحدث بسبب جبنه أو خوفه على مصلحته الشخصية

مذبحة بورسعيد التي راح ضحيتها أكثر من 80 شهيدا من خيرة شباب مصر ليست الأولى ولن تكون الأخيرة طالما لم نتحرك لخلع هذا المجلس الفاسد الفاشل الذى لا يمثل المصريين فى شىء فهو لا يعرف سوى قتل أبنائهم , لا يعرف سوى لغة الدم , وهى لغة الطغاة أمثال بشار المجرم والمخلوع ومن سبقوهم كهتلر وموسولينى .

لم تعد تجدي لجان تقصى الحقائق ولا البيانات الفارغة ولا الشو الإعلامى فالبطولة فى هذا الزمن لا بد أن يكون ثمنها الدم ,البطولة لن تكون فى ضبط النفس ولا إتباع اللوائح والإجراءات , البطولة هنا هي اتخاذ قرارات جريئة تعبر عن الشعب , لتعيد له حقوقه .

مم يخاف مجلس الشعب ؟ هل يخافون من المجلس العسكري , كيف ؟ وهم المؤسسة الشرعية الوحيدة ؟! لماذا لا يشكلون حكومة تنتزع السلطة من المجلس العسكري ؟لماذا لا تكون هناك مليونيات وحشد فى جميع شوارع مصر كغطاء لتأمين انتزاع السلطة ؟! لماذا السكوت إلي الآن ؟!!

المجلس العسكري في أوهن حالاته وما يفعله مؤخرا من جرائم ما هو إلا دليل ضعف وهشاشة وتخبط , فقد العسكري صوابه وعقله ويتجه للهاوية بيديه , مثله مثل المخلوع وزبانيته من أوغاد وسفلة الداخلية , فقد حسبنا أن دولتهم البوليسية لن تسقط وستستمر فى حكمنا للأبد لكنهم لم يستطيعوا أن يصمدوا سويعات قليلة أمام إرادة جموع الشعب الغفيرة

المجلس العسكري الآن مثل الشمعة التى قارب زيتها على الانتهاء فتعلوا نارها ثم تنطفئ فجأة , وهذا ما يحدث الآن فالعسكري قد كشف بكل بجاحه عن وجهه الخبيث ولعب بآخر أوراقة , فهو يكرر نفس سيناريو المخلوع " إما أنا أو الفوضى " لكنه سوف يسقط مرة واحدة ...قريبا

فالمجلس العسكري لم يتعلم الدرس جيدا , يحسب أنه يستطيع أن يصنع رأيا عاما مضادا بإعلام حكومي هش وإعلام خاص مفضوحة عمالته للجميع ,فنفس المؤسسات التى كانت تخدّم على نظام المخلوع ورجالة , هم أنفسهم الذين يخدّمون على العسكري
أصبحوا كروتا محروقة والشعب قد فهم اللعبة , فهم من معه ومن ضده , من يريد له الخير ومن يريد له القبر .

موقعة الجمل هى التى نزعت ورقة التوت وعرت مبارك المجرم القاتل وبينت حقيقته للبسطاء الذين تأثروا بإعلامه المهترىء طول الأعوام الماضية , و " مذبحة بورسعيد " قد عرت وكشفت سوءات المجلس العسكري ومخططاتهم الفاشلة التى لا تخيل على طفل فى الخامسة من عمره

الموضوع ليس قانون طوارىء , يطبق أو لا فالمجرمون القتلة لا يلزمهم قوانين ليمارسوا إجرامهم فهم لهم قانونهم الخاص , الأمر أكبر من مجرد قانون , الأمر فيه مليارات الجنيهات , شركات بترول , محاجر , مناجم , شركات اسمنت مقاولات , إدارة قناة السويس , رئاسة الأحياء والمحافظات ..الخ كل هذا يديره الجيش ويتحكم فيه ويدر عليه مليارات لا يعرف عنها أحد ,

والذى يدير الجيش هم الـ التسعة عشر عضوا – أعضاء المجلس العسكري وهم الذين اختارهم المخلوع بنفسه و لحم أكتافهم من خيره . و قد تفوقوا عليه فى الإجرام والتخطيط والتآمر, كل هذا حتى لا يفقدوا إمبراطوريتهم التى يديرونها

العسكر واهم إلي حد كبير يعتقد أنه يستطيع أن يسيطر على الملايين الغفيرة , يوجههم حسب رغباته ,, يخوفهم ويرهبهم , ينسى أننا فى الألفية الثالثة , ينسى أننا فى زمن الفيمتو ثانية والفيس بوك والتوتير , ينسى أننا جيل لا يعرف للخوف طريقا ,
ينسى العسكر أن زمن العبودية قد ولي
فنحن الآن فى زمن الحرية

الحرية أو الدم

بريد الكاتب | abdelrhmanakila@yahoo.com
Like · · Share · about an hour ago

محمود سعد: بدأ المشير كلمته بالشعب ساكت ليه شعب ايه اللي ساكت ليه يانهار اسود ومنيل بستين نيلة انت عايز الشعب يخرج ياسيادة المشير يضرب في بعضه يعني نطلع نضرب شعب بورسعيد يأما نطلع نضرب شباب الالتراس

سيادة المشير عاوزها حرب اهلية حسبنا الله ونعم الوكيل

وادى واحدة بمليون راجل يا أندال السلطة:-
.كتبت الأستاذة/نجلاء بدير:-
كنت أحاول أن أساعد أحد المصابين على دخول المستشفى الفرنساوى حين سمعت صديقى المسعف حمدى يقول «على فكرة الأستاذة هبة السويدى هنا من امبارح».
كدت أفقد الوعى من هول الصدمة «يا نهار اسود! هبة السويدى تانى! معقول للدرجة دى مافيش أى حاجة اتغيرت؟!».
أول مرة سمعت فيها اسم هبة السويدى كانت فى يناير، كنت أدخل المستشفى الفرنساوى فأسمع من يقول «هبة السويدى عالجتنى» وأدخل قصر العينى المنيل أسمع نفس الاسم، ثم أدخل مركز «الحياة» ومركز «العين»، ثم كنت جالسة على الرصيف فى ميدان التحرير بجوار مصاب سألته «إيه أخبارك؟ مين عالج عينيك؟» قال «أنا الحمد لله مش محتاج أى حاجة، أنا شايلانى واحدة اسمها هبة السويدى وشايلة ألف واحد زيى». , كان ذلك كله فى يناير وفبراير، حاولت أن أتعرف إليها لأكتب عنها فرفضت.
هذه المرة عندما سمعت اسمها قررت أن أتصل بها بأى طريقة، ردت علىّ، قلت لها «إنتى بتعملى نفس اللى بتعمليه كأن مافيش حاجة خالص حصلت، إزاى تقبلى تعملى كده؟ واجهى وارفضى وافضحى كذبهم. بيقولوا الصندوق بيصرف وانتى لسه بتصرفى». , رفضت هبة أن تتكلم، قالت «أنا مش هاقدر أعمل تسخين للرأى العام، وفى نفس الوقت مش هاقدر أسيب الناس تموت».
دفعت هبة وأصدقاؤها أكثر من مليونى جنيه، عالجوا أكثر من ألفَى مصاب , وكانوا يعتقدون أن مهمتهم الآن أصبحت منحصرة فى العلاج الطبيعى، والتأهيل، واستكمال الأدوية. وبدأت تبحث عن كيفية إقامة نادٍ اجتماعى يلتقون فيه ويتلقون علاجهم الطبيعى، ويتلقون دورات لتأهيلهم وكورسات لتعليمهم.
(عدد المصابين بالشلل والذين يتلقون العلاج فى مركز التأهيل بالعجوزة ودار المنى وفى بيوتهم مئات الحالات).
الحقيقة أنه بعد 8 أشهر قضتها هبة لا ترى أطفالها ولا تنام وجدت نفسها تبدأ من جديد.,وجوه جديدة من المصابين، نوعيات جديدة من الإصابات، بدأت تحتل الأولوية الأولى عند الأستاذة هبة كما يسمونها., منهم من أصيب برصاص فى رأسه واستقرت الرصاصة، وما زال يعيش لكنه فى غيبوبة كاملة، ومنهم من دخلت الرصاصة صدره ومزقت إحدى رئتيه، ومنهم من أصيب بعشرات الشظايا فى كل جزء من جسده ورصاصة واحدة اخترقت القولون. ومنهم من أصابت الرصاصة مثانته.
هؤلاء وغيرهم لم أستطع أن أحصى عددهم حتى الآن، جميعا تمر عليهم هبة وتزورهم وتتعرف إلى أسرهم، وتحارب لكى يتلقوا أفضل علاج ممكن، وتنقلهم من مستشفى إلى آخر.
الآن بينما أكتب هذه الكلمات تجلس هبة فى استقبال «الفرنساوى» لتنقل حالة من «الدمرداش» اسمه ناصر فاروق أصيب بطلق حى، وما زالت حالته غير مستقرة، لكن فيه أمل لو تلقى عناية أفضل، قررت هبة أن تنقله إلى رعايتها.
تعرفت هبة الحالة لأنها أرسلت أحد الذين يعاونونها إلى كل المستشفيات التى استقبلت مصابين، هل كنتم تعرفون أن «الدمرداش» استقبل مصابين؟ أنا شخصيا لم أكن أعرف. هبة عرفت وبحثت عنهم وذهبت إليهم ونقلتهم إلى مكان قد يجدون فيه عناية أفضل.
هل عرفتم الآن مَن هبة السويدى؟
رغم رفضها أن تفعل ما أطلبه منها، وإصرارها على أن تعمل فى صمت، رغم رغبتها الحقيقية فى أن تظل مختفية، رغم أنها تعتقد أن دورها الوحيد هو أن تفعل ما تستطيع لكى تساند البشر بإمكانياتها الشخصية وإمكانيات أهلها وأصدقائها، واعتقادى أنا أن دورها الأهم هو فضح كل الأكاذيب التى عشنا فيها طوال الأشهر الماضية.
رغم الخلاف بيننا فإننى أعتقد أنها تستحق تمثالاً فى ميدان التحرير كأحد أبطال الثورة المجهولين.

الساخر جلال عامر
كتب : علاء عبد الفتاح
و ارجو القراءة كاملة قبل اى تعليق و اى تلفظ خارج سيتم حذف صاحبه و منعه من دخول الصفحة
س: هي الشباب عند وزارة الداخلية ليه؟
ج: عشان غضبانة من القتل المجاني
س: أيوه يعني ناويين يعملوا ايه؟
ج: محدش عارف، هما نفسهم مش عارفين، هما عارفين الموت و الغضب بس
س: طيب ليه متقولهمش يروحوا التحرير؟
ج: عشان التحرير فشل يجيب حق اللي مات بدل المرة عشرة
س: طيب متقولوهم ... ؟
ج: أقولهم ايه بس، حد فيكم عنده حل بجد؟ أروح أضحك عليهم ولا أقولهم كلام شعارات؟
س: أصل مش عايزين دم؟
ج: القاتل مش مستنيك تروحله عند وزارته، بيخطفنا من الشوارع و يقتلنا في ماتش كورة، تفرق في ايه بقى!
س: طيب هما عايزين ايه يعني؟
ج: عايزين عيش و حرية و عدالة اجتماعية و كرامة انسانية، عايزين حق الشهيد، عايزين يفهموا ليه عواجيز بتخطط لمستقبل و أطفال بتكتب وصيتها
س: ايوه بس عايزين ايه دلوقتي حالا؟
ج: ولا أعرف، دي مش مظاهرة رافعة مطالب، بس هما بيهتفوا ضد المشير تعرف تجيبلهم المشير؟
س: سيبنا التحرير ليه؟ التحرير واسع!
ج: لا التحرير بقى ضيق قوي، كله مشاكل و خناقات و مخترق من التحريات و فيه ناس بتركب على المنصات و تزعق و ناس بتعمل حفلات تعذيب و ناس بتفرض ارضية على البياعين و ناس ثانية بتضرب البياعين و أخوان بتشارك بمطالب عكس مطالب الجماهير و ماخوانش نازلة عشان تتخانق مع الأخوان مش مع اللي بيقتلنا، انتم ازاي مش شايفين ده كله؟
س: طيب معلش و النبي مشيهم كفاية دم!
ج: و الله العظيم ما أعرف أمشيهم، محدش يعرف يمشيهم.
س: طيب لما أنت مش عارف موجودين ليه، و مش عارف عايزين ايه، و ملكش كلمة عليهم واقف معاهم ليه؟
ج: عشان اتعلمت في الثورة أقف مع دائما مع اللي بيتحدى الرصاص، مع اللي بيرفض السلطة، مع اللي يبدوا ضعيف و هو قوي، اتعلمت أن اللي بيوجع أكثر مش جرح الرصاص لكن جرح الغدر و البيع من على المنصات و الفضائيات، اتعلمت أني لو مش المكان اللي ممكن أتصاب أو اتقتل أو اعتقل فيه و فيه غيره بيتصاب أو بيتقل أو بيعتقل يبقى بعمل حاجة غلط. لو مش فاهم ده مش هعرف أفهمك.
س: طيب أنا أعمل ايه دلوقتي؟
ج: متشتمش اللي قدام الرصاص حتى لو أنت مش فاهمه، بلاش تنظير ما تقولش بلطجية ولا مندسين، متتكلمش كأنهم خراف في حد بيسوقهم، الشباب دي مش فاضله الا الارادة، اتاخد منه العمر و الحلم و الأخ و الصديق و العين و الرجل و الروح و نادي الكورة و الميدان و الثورة و كل حاجة و أي حاجة، مش فاضله الا الارادة، أنه هو اللي بيقرر يعمل ايه و محدش متحكم فيه، و قمة الارادة هي أنك تختار هتموت ازاي و تعيش ازاي.
س: اه بس أنا عايز أعمل حاجة ايجابية؟
ج:انزل اقف معاهم، مش لازم تشارك في الاشتباك بس انزل شم من نفس الغاز اللي بيشموه و افهم يعني ايه رش و خرطوش، انزل اتطوع في مستشفى ميداني أو وزع عليهم خل أو أكل.
س: مش عاجبني المواجهة مش عايز أنزل هناك؟
ج: خلاص انزل اتظاهر قدام وزارة الدفاع، أو في ميدان التحرير، أو شارك في مسيرات تسليم السلطة، أو انزل قدام ماسبيرو، أو اعمل عرض كاذبون، أو شارك في حملة حاكموهم، أو اشتغل على المحاكمات العسكرية، أو انزل سلاسل الثورة، أو انضم للجان الشعبية. المهم اعمل حاجة.

س: و لحد امتى هيفضل الحال ده؟
ج: لحد ما يسقط النظام

و خذوا دى:- منقولة من منتدى كورة مصرية
مش قادر اتكلم بعد ما تأكدت من الكلام ده وانه اتقال فعلا
يارب صبرنا
عضو
21:41 - اليوم
يا جماعه انا لسه سامع دلوقتي في قناه الاهلي واحد اسمه هيثم مراته ماتت في الاستاد و كان منهار طبعا و بيعيط
بعد ما قفل ابراهيم المنيسي بيحكي قصته بيقول انه هيثم ده يتيم و متربي في دار ايتام و مراته اللي اتجوزها كانت
معاه
في الدار و هو حضر فرحه من 6 شهور هو و عدلي القيعي لما دعاهم بيقول انه كان رايح بورسعيد يشتري شويه حاجات
و يحضر الماتش مع مراته مع جمهور الاهلي و بيقول انه جمهور المصري حدفوا مراته من مدرجات الاستاد و ماتت علي
طول و هي كانت حامل في الشهر التالت
ازززززززززززززززززززززززززاي يجيلهم قلب يحدفوووووووووووووووا واحده ست حااااااااااااااااااااااااااااااامل بره الاستاد هي
ديييييييييييييييييييييييييييي المرجله يا جدعان ااااااااااااااااااااااااااااااااااااااه

كلام الخائن خالد عبد الله ورد بلال فضل ثم رد الشيخ الألبانى عليه:-
بيقولهم أنتم هتقابلوا ربنــا إزاي ؟ لمــا يسألكم هتقولوله كنــا في ماتش ؟؟؟؟ بيجيبوا فلوس منين يروحوا بيهــا الماتشات ؟؟ أهاليهم بتشتغل ايه ؟؟؟
بلال فضل يرد عليه**إلى المدعو خالد عبد الله: لما شهداء الألتراس يقابلوا ربنا هيقولوا له إتقتلنا غدر وسبنا في الدنيا ناس واطية ماتحترمش قدسية الموت والأعراض
By: مصر بوك | Egypt Book
قال الشيخ الألباني - رحمه الله -
" حديث "من قتل دون ماله فهو شهيد ومن قتل دون أهله فهو شهيد ومن قتل دون دينه فهو شهيد ومن قتل دون دمه فهو شهيد
أخرجه أبو داود (2 / 275) والنسائي والترمذي (2 / 316) وصححه، وأحمد (1652) 1653) عن سعيد بن زيد، وسنده صحيح. وفي رواية "" من قتل دون مظلمته فهو شهيد " "أحكام الجنائز 1/42"