رثاء ثورة أم رثاء ثوار؟ من اشعار الدكتاتور العادل

اهداء الى الثوار الحقيقيين لثورة 25 يناير العظيمة وحيث أننى لا أجد أحدا منهم الاّن على ساحة الوطن فأنا أنعى اليكم وفاة ثورة كانت تبدو رائعة من أجل شعب يبدو انه لا يستحق


مروا مرور الأكرمين
وطواهم السر الدفين
هم ومضة وضاءة
أخفاها شيطان لعين
هل كانوا حلما عابرا؟
ام بعض نوبات الحنين؟
ام وحى رب باطن؟
ما ساعه قلب أمين
كانوا نجوما زاهرات
تهدى الحيارى التائهين
سيمهدوا الدرب العسير
سهلا لسير الكادحين
وينشئوا وطننا عزيزا
ينهى قهر المظلومين
عبروا بنا فى لحظة
فوق الصراط المستقيم
حتى حلمنا أننا
فى جنة الخلد العظيم
نرى كأن جسومنا
نورا يسر الناظرين
ثم غابوا فاكتشفنا
أننا ماء وطين
كم كان قدر مصيبتى
فى ضيعة الحلم الثمين
من ذا يشاطرنى العزاء
فى موات الصالحين؟
أم من يبرد مهجتى
ويكفكف الدمع الحزين؟
أسفا فلن يتكرروا
أبدا على مر السنين


الدكتاتور العادل

لما الخوف على الثورة من الاعلام الزائف
لو على الاعلام الزائف لكنا انتظرنا قيام الثورة كمان 100 سنة او يزيد
ميدان التحرير لسه بخير والمليونيات لم تنتهى
والناس عرفت السكة والطريقة
وكتر القسوة يعلم الاسية
وتراكم الهموم بيفجر حتى البلونة الناعمة الطرية ومن من ؟ من الهوا الطاير
استاذنا وشاعرنا الكبير بعد الشر عليك من الياس وانت آخر واحد عرفته يحافظ على الذهاب لميدان التحرير ولولا الملامة لأقمت هناك .

أخي الكريم د \ الدكتاتور العادل
كنت أعلم جيدا انك ستعود قريباً جدا لانك ونحن جميعا كنا ننتظر ثمار ثورة استعدنا بها حريتنا وكرامتناو تخيلنا انها بغيه كل المصريين
ولكن كانت الفاجعه بأن نري ونسمع ابناء جلدتنا يبتغون الذل والمهانه ويأبون إلا الخيانه
ولكن لا تحزن اخي الكريم ولا تبتأس فهؤلاء قله والاحرار كالسيل لن يقف امامهم أحد
فمصر عادت ولن يخطفها أحد مره ثانيه
فالأحرار يبكون شهدائــــــــهم .... والعبيد يبكون جلادهـــــــم

الاخت العزيزة الفاضلة الاستاذة\فاطمة
كلماتك رائعة حقا لكنها لا تشفى غليلى فالى لقاء قريب ان شاء الله لمناقشة الأمر فالموضوع كبير جدا جدا ودائما اقول ربنا يستر
الدكتاتور العادل

الدكتور الفاضل الدكتاتور العادل لا اجد كلمات اصف بها روعة ما كتبت ولكن ما هو الامر الذى تريد مناقشته ربما انرت لنا الطريق وربما استقرت قلوبنا التى قربت على السقوط

الاستاذة الفاضلة\هبة الله ردا على تساؤلك المكرر عن هذا الامر الجلل احيلك مؤقتا الى هذه المقالة اذا كان لديك وقت لأنها طويلة جدا لكن فيها اجابات كثيرة قد تنير لك الطريق وللعلم هى منقولة من موقع تهييس والجزء الاول والاكبر هو لنوارة نجم ثم بلال فضل ومكون من صفحتين
كتبت تقول :
اربعة مليار؟ ايه شغل الجرابيع ده؟ عشان كده شيخ الازهر بيقول الرحمة فوق القانون في التعامل مع مبارك؟
اتاريها الاربعة مليار فوق القانون
ايه اربعة مليار دي؟ ايه شغل الجربعة ده؟ احنا مش عايزين من ملك السعودية حاجة، مش عايزين من اللي شتموا شهدائنا وقالوا عليهم خارجين عن الحاكم حاجة، مش عايزين من اللي بيقولوا على الشعب المصري قليل الاصل حاجة، مش عايزين من اللي بيتحدوا القانون المصري وعايزين يهربوا طريد العدالة المخلوع من المحاسبة حاجة
ايه ده؟
اربعة مليار؟
ايه ده؟ ايه شغل الشحاتة ده؟ اربعة مليار دول نجيبهم لكوا في اسبوع
الفنانين اللي بياخدوا مليون جنيه في الفيلم، لعيبة الكورة اللي خانوا شهداء الالتراس وكل واحد فيهم كان بياخد مليون جنيه لما يتهزم، رجال الاعمال، شرفاء بقى ولا مش شرفاء، اللي فيهم مش عايز يدفع بمزاجه اقسم وسطه ضرايب
واعمل حملة تبرعات واحنا نجيب لك قد الفلوس دي عشر مرات، ومش عايزين منك شكرانية يا سيدي
ايه ياختي ده؟
رجعوا له الفلوس دي، حد الله ما بينا وبينها
تحديث:
وادي بالونة تانية اهي
قالك مبارك حيطلع وثائق تدين مسئولين كبار في الدولة لو ما تمش العفو عنه
اه.. انهي مسئولين يعني؟
اصل المسئولين عندنا نوعين، نوع وقف جنبنا يوم 11 فبراير، ونوع ما وقفش جنبنا يوم 11 فبراير
بالنسبة للي ما وقفش جنبنا اليوم ده مالوش حاجة عندنا غير الحبس
بالنسبة للي وقف جنبنا يوم 11 فبراير، احنا مسامحينه... مسامحينه مسامحينه مسامحينه
ثم اصلا مبارك ده راجل كداب.. مين اللي حيصدق مبارك؟ مبارك ده صاحب اسرائيل والسعودية وممكن جدا يزوروا له وثائق، الوثائق مكتوبة او مسموعة او مرئية تتزور بسهولة ودلوقت ما بقاش حد يقدر يعرف الحقاني م البراني
وطبيعي انه يقول الكلام ده دلوقت لما يحس انه بيتحاكم.. ولو الحكاية دي ما عملش كده ليه من اول ما طلبوا منه يتنحى بدل ما كان يبعت لعبد اللطيف المناوي قرار انقلابي؟ ولو هم عارفين انه ماسك عليهم ذلل ما كانوش اتجرأوا ينحوه
تتحل تتحل دي.. شفتوا؟ اهو باب زويلة يفوت عشر جمال اهو
هاه... خلصونا بقى، احنا لا سننا ولا صحتنا يستحملوا: مش سونيا اتصلت بيا؟ - سونيا؟ انت رجعت تلعب بديلك تاني يا راجل؟ - لا.. ما انا قفلت السكة في وشها.. باقولك... عايزة حاجة مني وانا راجع؟ - راجع منين؟ انت خارج؟ انت مش قايل انك قاعد معانا النهاردة وحتخرج العيال؟ - يا ستي باتكلم على بكرة.. وانا راجع من الشغل يعني
اه... كده صعب قوي، خصوصا يعني انها جوازة متعة بالمدة مش طالبة حرقة الدم دي
واحنا نازلين برضه يوم 27 نرفع عنكم الـ... لا مؤاغزة حرج
تحديث:
النطق بالحكم في قضية الشهيد خالد سعيد اتأجل ليوم 30 يونيو على ما يكونوا شافوا صرفة فينا او احنا شفنا صرفة فيهم
تحديث:
تم تكذيب خبر براءة الضابط قاتل خالد سعيد على نفس صفحة الفيس بوك اللي نشرته عشان احنا اصلنا ناقصين بلالين.. نجاتي انتشر على فكرة
تحديث:
الظابط اللي قتل خالد سعيد اخد براااااااااااااااااااااااااااءءءءءةةةةةةةة
احنا بيتعمل فينا حاجة قلة ادب


تحديث:
انا اتكلمت مع كذا حد اخوان على التويتر وبيقولوا لي: واحنا كل شوية ننزل وبعدين نتشتم ولما تحتاجونا تقولوا لنا تعالوا؟
سبحان الله
جماعة قوامها تلاتة مليون نفر زعلانة عشان خمستاشر واحد بيشتمها؟ ومستعدين تغامروا بأن مبارك يطلع، وجمال يطلع، وعلاء يطلع، والنظام يعيد انتاج نفسه عشان مقموصين؟
ده بجد ده ولا هم كام واحد بيفضفضوا اللي في قلبهم؟ ولا هي حجة؟
امال انا اعمل ايه بقى؟ انا فرد لوحدي وفيه مجموعات كاملة من البشر عايشة عشاني اساسا وما وراهش غيري؟ اروح انتحر بقى... هو اللي بيعرف ربنا بيقول كده؟ تطوير نظرية داروين ان الانسان اصله وسخ فما تتغرش بناس بتقولك انك حلو لانهم بعد شوية حيقولوا لك انك وحش، لان كل انسان ملكوت لوحده وبيحكم على الناس من نظره هو، لو اتفقت معاه تبقى حلو وجدع وبميت راجل ولو اختلفت معاه تبقى ابن كلب، ويا سلام بقى، يا سلام بقى لما تبقى واحدة ست في المجتمع الوسخ ده، بس اللي شاف ناس بتفرفر قدامه لحد ما تطلع في الروح يعرف ان دي اتمان رخيصة قوي، واللي نازل عشان الناس تقول عليه حلو ما ينزلش، واللي مقموص عشان الناس قالت عليه وحش بالسلامة، واللي فارق معاه محبة الناس وكراهيتهم يروح يدور على قصة حب من بتاعة منى واحمد، وعلى فكرة، حتى قصص الحب بعد شوية بتقلب بملل، ايه نقص الحنان ده؟ وسيدنا عمر بيقول "إنما تبكي على الحب النساء"؟ والنبي انا نساء اهو، او شبه نساء يعني، وما بابكيش على الحب ولا فارق معايا بتلاتة نكلة اللي بيقول لي باحبك من اللي بيقول لي باكرهك ولا فاكرة اساميهم حتى.. واللي قاعدين يبكوا على الحب جماعة عمرها تمانين سنة
ماحدش يزعل.. ماحدش يزعل
اللي نازل نازل عشان ينقذ بلده، لو كل الناس نزلت كتر خيرهم، لو ماحدش غيرك نزل احمد ربنا انك نلت الشرف ده وغيرك لا، وانت ميت وغيرك ميت، موت وانت محترم وغيرك يموت وهو ندل، المهم اللي بعد الموت مش اللي قبله
المهم اللي بعد الموت مش اللي قبله
ومدام مستبيع على روحك يبقى حنتمسك بمطالب الاجماع الوطني عشان ما نديش فرصة لحد انه يمسك علينا غلطة، ولا ندي حجة لحد انه يبقى قاعد في بيته وهو ضميره شبه مرتاح
والله الموفق
------------
تحديث:
مش انا اللي عاملة الفيديو ده، ده واحد اخده مني في الميدان لما لقاني عمالة اصوت واعيط لما عرفت ان جمال مبارك اتحفظ معاه التحقيق
بس كل واحد فينا بقى يعمل فيديو زي ده يقول ليه نازل يوم 27، يقول رأيه بمنتهى الحرية، واياك يفتح سيرة المجلس الرئاسي، مش عايزين حد يمسك علينا غلطة



تحديث:
لو سمحتوا اطبعوا الورقة دي كل واحد يطبع على الاقل عشر نسخ وينزل يوزعها على في الشارع على ناس ما يعرفهمش غير العشرة اللي هو يعرفهم وحيجيبهم معاه
بدل القعدة دي اللي مالهاش اي لازمة، ده فرض عين عليك تطبعها وتوزعها
انا بيدخل لي عشرين الف في اليوم، حنقول نصهم مش موافق او مش في مصر، يبقى فيه عشرتلاف، لو كل واحد فيهم طبع 10 ورقات ووزعهم وقال لعشر بني ادمين يعرفهم يبقى كده جبنا 200 الف.. غير كده تبقى مالكش لازمة بصراحة.. اتنحرر بقى الله يكرمك
فين ام روح التحرير بقى؟
--------------
والنبي الله يكرمكم نركز.. ونحاول نجمع الصفوف، احنا ما اتاكلناش على قفانا كده الا لما اتفرقنا وبقى اليساريين والليبراليين يشتموا في الاخوان والاخوان يغطسوا ويروحوا يجيبوا ورقة بوستة والسلفيين والمسيحيين يقعوا في بعض والدنيا تشرذمت خالص
صلوا ع النبي كده وموسى نبي عيسى نبي محمد نبي وكل من له نبي يصلي عليه
وبحق من قال لموج البحر يهتدي، لتقولوا يا عزيز
انا مش شايفة الناس مختلفة على الاهداف، انا شايفاهم مختلفين على الحلول
والاختلاف على الحلول مش مشكلة... فيه حل كلنا مجمعين عليه اللي هو وقفتنا في الميدان
اللي بيقول تأجيل الانتخابات ده عيل ساقط وعايز يأجل الامتحان
واللي عايز مجلس رئاسي كفران زيي، بس مش لازم يجبر الناس توافق معاه على حاجة هم مش عايزينها، خلاص يا شباب، ننزل على الاجماع واللي يحب البلد اكتر ييجي على نفسه
واللي بيتحجج انه مش نازل عشان اللي بيقولوا تأجيل الانتخابات ومجلس رئاسي بيناقد نفسه، وبيشتغلنا بصراحة، لأنه في نفس الجملة بيقول الاغلبية مش عايزة كده، طيب يا عم انت الاغلبية، ما تنزل تاكل الميدان لصالحك، انت حتشتغلنا؟
الله.. جرا ايه؟ ما نزلتوا اليوم اللي ظباط التحرير نزلوا فيه وكان فيه ناس بتقول نازلين نسقط المشير ولما انتوا نزلتوا الميدان اتاكل لصالحكم وبتوع يثقط المثير دول بقوا نملة في غيط
من بات في بيته سلم اصحابه
حد مختلف على ان مبارك وحاشيته لازم يتحاكموا؟ ومش بس يتحاكموا على الفلوس يتحاكموا على الدم؟
حد مختلف ان فيه حاجة مش تمام بتحصل وانهم بيتسرسبوا الواحد ورا التاني؟
حد مختلف ان دول لو خرجوا حيبقى نهارهم نادي ونهارنا احنا اللي مش باين؟
حد مختلف على ان التهديد بالازمة الاقتصادية لوي دراع وان مصر فيها اقتصاديين عباقرة يحلوا الازمة الاقتصادية دي في يوم ونص؟
حد مختلف على ان التحجج بالازمة الاقتصادية لعدم محاسبة رجال الاعمال الفاسدين ورجال الوطني حجة مش مقبولة؟
حد مختلف على حد ادنى واقصى للاجور؟
حد مختلف على ان ما ينفعش شباب طاهر ونقي يتقدم لمحاكمة عسكرية في نفس الوقت اللي الجمل بيدعو فيه للمصالحة مع الحرامية؟
حد مختلف على ان الجمل لازم يمشي امبارح؟
حد مختلف على ان عمر سليمان بيلعب في اساسنا بالفتن الطائفية ولازم يتجاب؟
حد مختلف على ان عودة امن الدولة بالشكل ده مش مقبولة وانهم لازم يبقوا تحت اشراف قضائي وحقوقي؟
حد مختلف على ان الشرطة عاد لينتقم.. واذا كان على الشرطة امرها سهل تنضرب تاني مدام بقت مدمنة ضرب، لكن ينفع الجيش يكتفنا للشرطة، خلاص.. الجيش يخلي بينا وبين الشرطة ولا يتدخل لا لصالحنا ولا لصالحهم، واحنا نتصرف معاهم، لكن ظابط شرطة يقول لظابط جيش قدام العيال بتوع السفارة: انا جاي اخد تاري؟ الله الله الله.. هي بقت كده؟
من هنا ليوم الجمعة ممنوع الآتي:
1- الخلاف والشقاق
2- الاتهام والتخوين
3- طرح قضايا خلافية
كل واحد حييجي على نفسه عشان اخوه، المهم نرجع الميدان رجعة قوية ويبقى شكلنا محترم
المجانين يمتنعون.. المهم وحدة الصف
الاندال يتنحررون.. عشان وكتاب الله المجيد انتوا اول الناس حتندبحوا، لايموها بقى، بقاء المجانين كمعارضة في مصلحة النظام القديم اللي بيعيد انتاج نفسه لانهم اساسا تغور المعارضة من وشهم، الناس بتكرههم وما بيعرفوش يكسبوا الشارع، بالعكس، كل لما يتبنوا قضية الناس تكرهها كأنهم ثورة مضادة على نفسهم، الناس كرهت العمال من وشهم، وكرهت البرادعي من وشهم، وكرهت الديمقراطية من وشهم، وكل ما يحطوا صباعهم في حاجة يكرهوا الناس فيها.. بالصلاة ع النبي، عاملين زي مبارك ربنا مسلط عليهم نفسهم
فدول مافيش اي خطر عليهم، حيتسابوا يعني، عشان النظام القديم الجديد يشاور عليهم ويقول: لو عارضت حتبقى زي عمو الجرسون
انما اللي بيعرف يكسب الشارع هو ده اللي حيندبح، وحتبقى مدبحة تاريخية، ومدبحة بتشويه، ومش بعيد يطلعوكوا عملاء وجواسيس وقرف.. لايموها بقى، بلاش غباء
مافيش داعي للندالة
انت بتستندل مع نفسك كده
الايفينت بتاع يوم 27 مايو اهو لو سمحتوا اعملوا اتند وشيروه وفيه المطالب اللي عليها اجماع وطني
Posted by جبهة التهييس الشعبية at 11:45 120 comments
Labels: ثورة كلاكيت تاني مرة
جمال مبارك اتحفظ التحقيق معاه؟

ويا ترى ده خبر ولا بالون اختبار برضه؟
انا كنت في الميدان النهاردة والعدد طبعا ما كانش كبير زي ما كلنا توقعنا
بس يوم 27 لازم يبقى كبير
ويبقى كبير قوي
اكبر مما نتخيل.. والا حنبقى بنحكم على ثورتنا بالاعدام، وبصراحة الاخوان اللي عمالين يستندلوا دول بيلفوا الحبل حوالين رقبتهم
فيه ايه؟ ايه حالة النوم دي؟ ما نفوق بقى شوية
احنا في خطر
سوزان مبارك وفتحي سرور وجمال مبارك ومرتضى منصور وابراهيم كامل والغمراوي وكل عصابة القناع الاسود بيتسرسبوا
فلوس ايه اللي بتحاكموهم عليها؟ احنا اللي بينا وبينهم فلوس ولا دم؟
وموقعة الجمل ايه الطناش اللي عليها ده؟
وماحدش يفتح بق امه في موضوع السولار واكل العيش والكلام الفارغ ده، ما تحطوش على لسان الناس كلام هم ما قالوهوش، انا اللي بانزل في البلاعات مش انتوا، والناس بتقول: الثوار المجلس العسكري خدهم في حضنه وسابونا
ما بيقولوش اكل العيش.. بيقولوا اخدوا مكاسب واحنا نأبنا طلع على شونة
والاخوان اذا كانوا فاكرين انهم ظبطوا مع الجيش وحيضحكوا عليه وعلى امريكا وعلى الدنيا كلها وعلى اساس كده عاملين نفسهم ميتين لازم يعرفوا انهم اول ناس حيتعمل لهم مدبحة لو النظام السابق اعاد انتاج نفسه، وهو بالفعل بيعيد انتاج نفسه
نفوق بقى شوية
انا تعبت وزهقت واعصابي باظت وما بانامش وما باكلش وامي زعلانة مني وصحابي زعلانين مني وقرايبي زعلانين مني ومش باشوف ابويا.. النهاردة كان فرح اعز اتنين صحاب ليا في الدنيا وما حضرتش فرحهم اللي انا كنت مستنياه اكتر منهم هم الاتنين.. عشان يا قاعدة في الشارع، يا قاعدة قدام الجزيرة، يا باتخانق
ايه وجع القلب ده؟ ايه القرف ده؟
ومجلس رئاسي مدني ايه اللي بيتكلموا عنه دلوقت وحيفرق الناس؟ انا شخصيا موافقة عليه، بس المطلب ده مش كل الناس موافقين عليه، ولو الاخوان ضحكوا عليكوا وقالوا لكم نازلين وانتوا حاطين المطلب ده اعرفوا انهم كدابين ومش اول مرة يكدبوا يعني، ولو انتوا ضحكتوا على نفسكم وافتكرتوا انكم تقدروا تنزلوا بشكل مؤثر من غير الاخوان يبقى انتوا بتخدموا الخطة اللي بتتنفذ ضد الثورة وخلاص بقى اللعب على المكشوف
والله العظيم تلاتة
والله العظيم تلاتة
والله العظيم تلاتة
لو عصابة القناع الاسود خرجوا، والنظام اعاد انتاج نفسه، ورجع ابوك عند اخوك النظام حيرجع اسوأ من الاول، واشرس من الاول، واهو قاس القوة على الارض وعرف ان الاخوان مؤثرين وحيقضي عليهم تماما عشان ما يفوقوش عليه تاني، وحتبقى جماعة الاخوان دي اسم مكتوب في التاريخ، ده غير الانتقام من الفقرا اللي ابتدا دلوقت، ظباط الشرطة سارحين على سواقين الميكروباص وسكان العشوائيات يضربوهم ويبهدلوهم وياخدوا منهم اتاوات ويقولوا لهم: مش عملتوا ثورة؟ خلي الثورة تنفعكوا يا ولاد... وحكاية الفتنة الطائفية دي واكلة مع الناس قوي مش عارفة ليه؟ وكفاية بقى.. كفاية بقى خيانات، اللي بيشارك في الفتن دي خاين خاين خاين زيه زي جاسوس اسرائيلي، وباقولها اهو: اللي بيشارك فيها سواء بالفعل او رد الفعل الاتنين خونة
ووالله العظيم تلاتة
والله العظيم تلاتة
والله العظيم تلاتة
لو الخطة دي نجحت ما سايبة الشارع وحاحط نفسي قدام اول دبابة اشوفها ومش حاتحرك من قدامها لحد ما تشيلوني عشان تدفنوني وده عهد عليا.. ولو ما عملتش كده تفوا عليا كل ما تشوفوا وشي انا دلوقت اهو ما عنديش اي رغبة في الحياة.. بعد كل الناس اللي ماتت دي ما عنديش اي رغبة في الحياة.. ولو الثورة دي ضاعت حاموت نفسي
جمال مبارك اللي بيخدم اسرائيل حيخرج؟ والتحقيق معاه بيتحفظ؟ ومبارك قال لفريد الديب اتنازل عن الفلوس عشان يخرج؟ والثوار هم اللي بيتحاكموا محاكمات عسكرية؟ ومرتضى منصور مرشح نفسه للرئاسة؟ تخيل بقى لو مرتضى منصور رئيسك
ايه النوم ده؟ حاولع في نفسي.. حاموت نفسي
حاموت نفسي.. امن الدولة بيشتغل بكامل طاقته
يوم سبعة وعشرين لازم يبقى مليوني.. لازم يبقى مليوني
ولازم نطبع ورق ونوزعه في كل حتة
كل واحد بيقرا البوست ده يطبع 10 ورقات على الاقل ويوزعها على ناس ما يعرفهمش في الشارع، مش كفاية تقول لناس من قرايبك وصحابك، لازم تقول لعشرة من معارفك وعشرة ما تعرفهمش عشان ييجوا.. ده فرض عين عليك، وحسبي الله ونعم الوكيل فيك لو ما عملتش كده
حتموتوني
ودي المطالب
اولا: المطالب السياسية
1- تقديم مبارك للمحاكمة بتهمة الخيانة العظمى، على اثر اعتراف المشير بإعطاء مبارك الامر للقوات المسلحة بقتل المتظاهرين
2- اشراف قضائي وحقوقي على جهاز الامن الوطني ومحاكمة كل الضباط المتورطين في قتل المتظاهرين وتعذيبهم
3- حل جهاز الامن المركزي او ادماجه في الجيش انشالله يشتغلوا مزارعين
4- اقالة يحيى الجمل ومحاكمة عمر سليمان في ليلة واحدة بقى، هي ايه الحكاية؟
ثانيا: المطالب الاقتصادية:
1- وضع حد ادنى واقصى للاجور واعادة توزيع الثروات لانقاذ البلاد من الازمة الاقتصادية والتحكم في الاسعار
2- فرض الضريبة التصاعدية
3- محاكمة كافة رجال الاعمال الفاسدين ومصادرة اموالهم
ثالثا: الحريات
1- الغاء احالة المدنيين الى قضاء عسكري
2- اعادة محاكمة كل المحكوم عليهم باحكام عسكرية بعد تحويلهم الى المحاكم المدنية
3- حظر فض الاعتصامات بالقوة بشكل كامل
دي مطالب اجماع وطني، وتمس الناس بشكل مباشر، ما يقعدش كل واحد نفسه في حاجة يقولها لي في التعليقات
وماحدش يجيب سيرة المجلس الرئاسي المدني لاني باقولكم اهو الاخوان مش حينزلوا بكامل طاقتهم، وده مش مطلب اجماع وطني... ولو الاغلبية عايزاه حيبان في الهتاف في الميدان، بس ما يتحطش في المطالب.. انا عن نفسي عايزاه، بس الناس مش تحت امري عشان كل حاجة انا عايزاها يعملوها، ومش حافرق الناس واشتتهم عشان حاجة انا عايزاها وهو مش رأيهم
اللي نفسه في حاجة يطلبها من ربنا في الروضة الشريفة، لكن ما يقولش مطالب تفرق الناس وتشتتنا عشان يزايد على امنا بالثورية ويعمل لنا مجنون
لا بقى.. طول عمرنا علمونا واحنا صغيرين كده ان المجنون بيأدي اداء الامن والامن بيأدي اداء المجنون ودايما كان الامن اللي بيتحشر وسطنا هو اكتر واحد بيزايد علينا في الثورية عشان يورطنا في مصايب ويفرق صفنا ويشكك الناس في بعض ويكرههم في بعض
قديمة قوي وللاسف كل البهايم واقعين فيها
----------





Posted by جبهة التهييس الشعبية at 00:16 101 comments
Labels: ثورة كلاكيت تاني مرة
Thursday, 19 May 2011
هرمنااااا هرمنااااااااااااااااااااا ومستنينكم في الميادين بكرة

تحديث:



تحديث:
اوعى.. اووووعىىىى... اوعى نختلف، دي الطريقة اللي عرفوا يسيطروا بيها علينا
اننا مسكنا في بعض
نرجع للاجماع الشعبي، وانا اللي بالف في الشارع وبانزل البلاعات
انزلوا البلاعات واسألوا الناس، الآتي هي قضايا الاجماع الشعبي:
1- اللي في شرم يروح طرة
2- واللي اخد اخلاء سبيل يرجع السجن
3- وموقعة الجمل يتحقق فيها
4- والاقتصاد احنا نصلحه ولا الحوجة للسعودية والامارات والكويت
5- وما ننضربش تاني ولا نتهان واللي اخد حكم عسكري يطلع... يطلع
6- والانتخابات ما تتأجلش
انا سألت ناس في الشارع بنفسي وده اللي انا وصلت له، اسألوا انتوا كمان.
وحننزل الميدان بكرة بقضايا اجماع شعبي ان شاء الله. ما نطرحش قضايا خلافية. اذا كان المجلس الرئاسي - اللي انا شخصيا بقيت معاه دلوقت - حيعمل خلاف، بلاش. نتكلم عن اللي يجمعنا.
اوعى الفرقة
-------
العفو عند المقدرة

بلال فضل

زهقنا من جس النبض، قرفنا من بالونات الاختبار، هرمنا من الغموض، سئمنا من عدم المصارحة، ورمنا من الاستهانة بدماء الشهداء.

لماذا لا يخرج أحد من حكام هذه البلاد ليقول لنا صراحة: نحن لن نحاكم حسنى مبارك ولا زوجته ولا ابنيه ولا كبار رجاله، لأنهم جميعاً أخذوا الوقت اللازم لتستيف أوراقهم وحساباتهم وليس هناك ما يدينهم، وبما أنه ليست لدينا قوانين تُحاكم الفساد السياسى، ولسنا راغبين فى استصدارها ولا حتى راغبين فى محاكمتهم طبقاً لما هو موجود من مواد قانونية تحدث عنها رئيس محكمة جنايات الإسكندرية منذ شهر ولا حياة لمن تنادى، فكل ما هنالك أن هناك بعض كباش الفداء ستسقط، بعضها سمين مثل حبيب العادلى، وبعضها هزيل مثل مدير تلك المؤسسة أو رئيس ذلك الاتحاد.

قولوا لنا ذلك لكى نعود فى التو واللحظة إلى الميادين والشوارع، وننال الشهادة التى كنا نحلم بها، أنا آسف لأن حماسة اللحظة جعلتنى أقع فى الكذب، نعم، كذبت وأعترف لكم الآن بأننى لم أحلم بالشهادة عندما شاركت فى يوم الخامس والعشرين من يناير والأيام التى تلته، فقد كنت خائفا بشدة، وكنت راغبا بجنون فى أن أشهد هذه البلاد وقد تغيرت إلى الأبد، نعم كنت أحب الحياة وأكره الموت، لكننى وأقسم بالله العظيم بعد أن رأيت خيرة أبناء مصر يسقطون إلى جوارى شهداء وجرحى ويضحون بأرواحهم من أجل مصر، أحب الموت الآن وأكره الحياة يوماً واحداً فى ظل ثورة مقطومة لأسباب لا أعلمها ولا أريد أن أعلمها. كل ما أعلمه أن الله سيلعننا جميعاً لو فرطنا فى حق هذه البلاد وسمحنا لها أن تعيش يوماً واحداً فى ظل نظام شبه صالح أو شبه عادل أو شبه مستقيم.

لن نسألكم عن عفو لم تأخذوا رأينا فيه، سنسألكم لماذا تتباطأون فى وضع حسنى مبارك وزوجته فى المكان الذى يليق بكل فاسد وظالم وسارق ومنتهك لحق الناس؟

ومن قال لكم إن غاية المراد من رب العباد هو أن نحاسب لصوصا بعد أن منحناهم الوقت الكافى لإخفاء المسروقات؟ أنا لا أتحدث باسم أحد، أتحدث عن نفسى فقط، أنا لم أخرج يوم 25 يناير حاملا أدويتى فى جيبى مستودعا الله زوجتى وبناتى لكى أشعر الآن بالنصر فقط لأن حسنى وزوجته أعادا كذا مليون إلى خزانة الدولة، أنا أصلا لم أبلع أبداً شعار (عيش حرية كرامة إنسانية) الذى وجدت من حولى يهتفون به، بل هتفت من أعماق قلبى ومن أول لحظة أصابنى فيها دور الهتاف صارخا (يسقط يسقط حسنى مبارك)، ليس لأن بينى وبينه ثأرا شخصيا، فقد نشأت ونموت وترعرعت وكان يفترض أن أموت فى عهده هو وابنه، بل هتفت بسقوطه لأنه رجل أهان هذا البلد العظيم الذى عرفت عظمته من كتب التاريخ، فأنا من جيل لم يشهد تلك العظمة فى الواقع، هتفت ضده من أعماق قلبى لأننى تذكرت مئات المرضى الذين كنت أراهم يرقدون إلى جوار والدتى فى معهد الأورام المنهار، لأن خيالات ضحايا العبارة الغارقة ومراكب الموت ومسرح بنى سويف وقطار الصعيد ستظل تطاردنى حتى أموت، لأن دموع المعذبين فى زنازينه كانت ستلعننى لو لم أهتف بسقوطه، لأن كل لحظة قضيتها فى بلاد الله التى تقدمت وتطورت واحترمت كرامة الإنسان كانت ستلعننى لو لم ألعنه.

العفو!، أى عفو؟ يا سادة العفو عند المقدرة، ونحن لم نعد قادرين على التحمل بصراحة، ولذلك عفواً لن أسألكم: هل ستعفو عن مبارك وعن رجاله أمهات الشهداء؟ هل ستعفو عنهم ابنتا طارق الأقطش؟ هل ستعفو عنهم أم زياد بكير؟ هل ستعفو عنهم زوجة أحمد بسيونى؟ لن أعدد لكم أسماء الشهداء ولن أذكركم بصورهم، أنا آسف، لن أفعل ذلك، لأننى موقن بحتمية محاكمة مبارك ورجاله ولست محتاجا من أجل ذلك إلى كل تلك الدماء الطاهرة التى لا يساوى مبارك وكل رجاله نقطة واحدة منها، لقد كاد مبارك يزهق روح مصر ومصر فوق الجميع وأغلى من الجميع، لقد أهان رجال مبارك كرامة مصر، وكرامة مصر فوق كل اعتبار، إذا كنتم حقا حريصين على اقتصاد البلاد واستقرارها وأمنها، فاعلموا أن مصر أغلى من حسنى مبارك ورجاله ونسائه، إذا كانت لديكم اعتبارات خفية فقولوها لنا لأننا زهقنا من هذا الملل، لا تطلبوا منا أن ننظر إلى الأمام وأنتم تجبروننا كل يوم على أن ننظر إلى الخلف بقلق وترقب، لا تحرموا أحلامنا من فرصتها فى أن ترى النور كاملة قبل أن تطالبونا بأن نسير خلفكم.

لقد وقفنا ضد كل من يريد أن يوقع بيننا وبينكم تحت أى مسمى أو أى سبب، لأننا ندرك أنكم العمود الصلب الوحيد الذى نجا من تهشيم مبارك والذى لا تستغنى عنه مصر أبدا، ولذلك نرجوكم ألا تجعلوا تلك الوقيعة تحدث بفعل قرارات متعجلة قد يزينها من يبدو أنهم حسنو النية، اتركوا هذا الملف الشائك للشعب والشعب وحده، اجعلوه حقا للرئيس المنتخب والبرلمان المنتخب القادمين، اتركوا مبارك ورجاله يواجهون مصيرهم الذى سيقرره الشعب، والشعب وحده.

أنا لا أتحدث باسم أحد، أنا أتحدث عن نفسى فقط، وما أعرفه أنه إذا كانت مصر تحتاج إلى ثورة ثانية وثالثة ورابعة من أجل أن تصبح وطنا يتمتع بحرية كاملة وعدالة كاملة وتغيير شامل، فوالله العظيم ثلاثة، وحياة شهداء ستة أكتوبر وثمانية وعشرين يناير، سأمنحها روحى ودمى وحريتى، فلست أغلى من الذين استُشهِدوا أو جُرِحوا أو اعتُقِلوا قبل الثورة وأثناءها وبعدها، أنا ببساطة مثل كل الذين رأيتهم فى الميدان، لست طالب ثأر، بل طالب عدل، والعدل لا تصنعه الغرف المغلقة، بل يولد فى قاعات المحاكم المفتوحة للناس التى تمنح عدالة كاملة، وليس عدالة إلا ربع كالتى كان يمنحها نظام مبارك بمزاجه وقتما يشاء ويحجبها عمن يشاء.

هل أنا وحدى الذى يفتقد التحرير ياجدعان؟
-------------
لا مش لوحدك.. انا نازلة بكرة الميدان انشالله ابقى لوحدي خالص، مش مهم
لو حد يذكر اني قلت قبل كده: مجلس رئاسي مدني على جثتي.

مش مهم جثتي على فكرة، انا بعد اللي ماتوا جنبي ودمهم غرق هدومي ما عنديش اي رغبة في الحياة، والله العظيم تلاتة ما عندي اي رغبة في الحياة، وبشكل مستمر صايباني حالة ندم وشعور بالذنب اني عايشة، ودايما ابص للسما واقول: انت زعلان مني ولا ايه؟ اشمعنى هم وانا لا؟

بعد اذنكم، حفاظا على ثقتي في كتاب التربية الوطنية اللي اخدته في المدرسة، وحفاظا على تصوراتي عن ظابط الجيش المصري اللي قريت عنه في الكتب وفي شهادات الظباط الاسرائيليين نفسهم وفي وثائق ويكيليكس واغاني نصر اكتوبر اللي كل ذكرى نصر باقعد اسمعها وانا واقفة عشان ما يصحش اسمعها وانا قاعدة، حتى لو قاعدة لوحدي في الاودة

امشوا.. امشوا قبل ما اكرهكم.. انا لسه ما كرهتكوش، شفتوا انا قلبي طيب ازاي؟ قعدت مع محمد عفت امبارح، ومع البنات والشباب اللي كانوا عند السفارة، وحكوا كل حاجة، ووجعوا لي قلبي، ومع ذلك لسه ما كرهتكوش، انا زعلانة ومجروحة، ومش بازعل ولا اتجرح غير من اللي باحبه، ما تكرهونيش فيكم عشان انا وغيري لو كرهناكم حنعاملكم زي ما عاملنا الشرطة، ما توصلوش الامور بينا لكده
امشوا.. اي مجلس رئاسي مدني منتخب حينفع.. لو جبنا فرقة شباشب حتنفع لأن الشعب حيعرف يمشيها ويتحكم فيها ومش حيبقى بين الشعب وبينهم غير الشغل وان كنتوا اخوات اتحاسبوا، لكن انتوا كده بتحطونا في مزنق احنا مش عايزينه، ليه تخلوا الاختيار: نحافظ على الجيش المصري والمؤسسة العسكرية المصرية وفخرنا بيها ولا نحافظ على كرامتنا؟ ليه تحطوا الاختيار كده؟ ما تضطروناش لحاجات احنا مش عايزينها واكيد انتوا مش عايزينها
ومافيش داعي للاستخفاف بذكائنا، اذا كنتوا لامين حواليكم شوية اغبيا ببرانيط، احنا مش اغبيا، ومش ببرانيط، ومش بنطنش عشان احنا عبط وبريالة، احنا تعمدنا نعمل عبط، وكنا عارفين انكم كنتوا نازلين تموتونا واحنا اخدناكم بالحضن عشان نحتوي الموقف، والشعب ساس الموقف بمهارة، واللي اتقال له انزل على ركبك ده تتشال جزمته على الروس... خصوصا على راس اللي حلف يمين انه يموت عشانا وساب المدني هو اللي يموت ووقف يتفرج. ما تخلوناش نقلب في اللي احنا تعمدنا نسكت عنه، مش عشان عينا مكسورة، ولا عشان اغبيا وسذج، عشان بنحب بلدنا ونفوت بمزاجنا لما نحب... عشان نحافظ على بلدنا... ومش حنفوت بعد كده، برضه عشان نحافظ على بلدنا.. وحد الله ما بيني وبينك غير حب الوطن يا حكومة
احترمونا شوية
وابقوا على اللي فاضل جوة المصريين ناحيتكم.. سيبكم من العيال الظييطة على النت اللي نفسه يبقى ثوري حتى لو حيشتم مصر ذاتها ولما يخلص شتيمة حيندار على امه وابوه وبعدين حيشكك في نسب نفسه بس عشان يشتم امه، مصر مش الفيس بوك ولا التويتر، ولا الفيس بوك والتويتر هم اللي عملوا الثورة، دي اخرتها؟ بعد البوس والاحضان دي كلها تنزلوا الشرطة لسواقين الميكروباص تهينهم تاني وانتوا واقفين في ضهرهم تحموهم من الشعب؟ الشرطة عمرها ما كانت حتفتح فينا لولا وقفتكم في ضهرهم.. ليه كده؟ المواطن المصري العادي بيحبكم.. انا اللي بالف في الشارع، والمواطن المصري العادي زعلان زعلان زعلاااااااااااااااان جدااااااااااااااا منكم
ما تختبروش صبر المصريين
احنا راجعين الميدان... ورجعتنا للميدان بكرة عشان نحافظ عليكم ونقول لكم روحوا مكان ما جيتوا وانتوا لابسين اكاليل النصر واحنا مسامحينكم على اللي فات قبل ما الجراح توسع اكتر من كده وتتملي غرغرينة وما ينفعهاش غير البتر ويبقى فات المعاد


Posted by جبهة التهييس الشعبية at 13:58 136 comments
Labels: ثورة كلاكيت تاني مرة
Wednesday, 18 May 2011
والله الموفق.. والبوستعان

تحديث:
ميدان التحرير الآن



تحديث:
النائب العام بيقول مش انا.. والمجلس العسكري بيقول مش انا.. امال مين؟




احنا عندنا جمعتين كده
جمعة حنبتديها بالادب.. اللي هي يوم 20 مايو
جمعة "احنا باديين بالادب" اعتراضا على الافراج عن كل من:
مرتضى منصور، فتحي سرور، سوزان مبارك، زكريا عزمي، وحكاية الاعتذار وكلام يحيى الجمل عن قانون المصالحات
واحنا عارفين ان القانون ده والافراجات دي جاية من السعودية رأسا.. ولو احنا عملنا ثورة عشان السعودية تبقى هي الباب العالي كده لازمنا ثورة تانية.. بس احنا مش حنقول كده، احنا حنقول، سيبكم من السعودية والامارات والكويت اللي بتقول ادونا مبارك وخدوا عشرة مليار دولار كأننا رقاصين ومستنيين النقطة... مش عايزين نبص في خلقهم اساسا
بالنوسبة للحجة بتاعة الاقتصاد
احنا مستعدين لتدشين حملة تبرعات لانقاذ الاقتصاد الوطني، قولوا لنا عايزين كام واحنا رقبتنا من مليار لترليون، وحتشوفونا حنعمل ايه؟
شريطة تحقيق المطالب الاتية:
1- اعادة اعتقال كل من افرج عنهم.. احنا في قانون طوارئ، ولا ايه؟
2- محاكمة مبارك عن جرائم القتل
3- فتح ملف كنيسة القديسين بشكل عاجل وفوري والتحقيق فيه.. والموضوع ده حيقضي على الطائفية خالص
ثبت براءة الاسلاميين من تفجير كنيسة القديسين، وتم الافراج عن كل المتهمين في القضية
طب الكنيسة دي انفجرت لوحدها؟ فيه بلاغ متقدم ان العادلي هو اللي فجرها، والصحف الاجنبية بتقول انه فجرها بناء على تعليمات من مبارك اللي اخد بدوره تعليمات من اسرائيل اللي كانت عايزة تضرب غزة
القضية لو اتحلت واتعمل فيها حكم مافيش حد حيتكلم عن فتنة طائفية تاني ابدا، لا المسيحيين حيتهموا المسلمين، ولا المسلمين حيقعدوا يدوروا للمسيحيين على اي غلطة عشان ما يحسوش انهم هم متهمين لوحدهم
ماهو خلينا نبقى صرحا، المسلمين بيعملوا كده في المسيحيين عشان حاسين انهم متهمين لوحدهم، والشهادة لله المسيحيين مش مقصرين في الموضوع ده، وكل ما بيتهموهم اكتر، كل ما المسلمين بينكشوا عليهم شعرهم اكتر، فالتانيين بينكشوا شعرهم عليهم راخرين لانهم بني ادمين مش كنب يعني.. وهكذا
حلوا لنا الموضوع ده من جدوره.. الاتنين اهبل من بعض وحيبوسوا بعض ويعيطوا لما كل واحد فيهم يعرف ان التاني مش متهم
4- تقديم مبارك الى محاكمة عسكرية بتهمة الخيانة العظمى
المشير طنطاوي في خطابه لدفعة الشرطة المتخرجة حديثا قال بالنص "طلب منا اننا نفتح النار على المتظاهرين وكان قرارنا بالاجماع لأ مش حنفتح النار على المتظاهرين" لا والشرطة صقفوا.. صقفوا للجيش عشان ما فتحش علينا النار وهم اللي نالوا لوحدهم شرف فتح النار علينا
5- الافراج عن كافة المعتقلين في حادث السفارة الاسرائيلي
6- الافراج عن كافة النشطاء اللي اتقبض عليهم في المحاكمة العسكرية.. خصوصا
عمرو البحيري
7- وقف المحاكمات العسكرية للمدنيين بشكل فوري
شوفوا الادب؟
شوفوا الاخلاق؟
شوفوا الاحترام؟
عدانا العيب؟ اذا كان على الفلوس بنقول لكم رقبتنا... اعلنوا عن حملة تبرعات وشوفوا المصريين بقى، وبالسلامة استثمارات الخليج الى غير رجعة
دي جمعة الادب
جمعة 27 بقى حتبقى جمعة قلة الادب.. اديني قلت اهو

Posted by جبهة التهييس الشعبية at 00:08 154 comments
Labels: 25 يناير
Tuesday, 17 May 2011
ماذا تفعل لو كنت حرامي




تحديث:
لقد فقعنا في الوخ.. زكريا عزمي خرج بكفالة ميتين الف جنيه
كده بانت خلاص يا شباب
احنا نازلين الجمعة 20 مايو.. انتوا مش نازلين؟ انا نازلة لوحدي

تحديث:
تم التصديق على الحكم على عمرو البحيري بخمس سنين
انزل على ركبك
لا مش حننزل على ركبنا... ومصر مش مومس عشان تبقى المحاكمات ضد الفاسدين هي اللي بتقطع عيشها.. لو محاكمة الفاسدين حتقطع عيشها، يبقى عيشها كان حرام، وربنا يرزقها من الحلال مدام تابت توبة نصوحة


تحديث:
جمعة رفض الاعتذار 20 مايو... كله اتند وهات معاك 10 وانت جاي
تحديث:
اخلاء سبيل سوزان مبارك مقابل 24 مليون جنيه.. جنيه... جنيييييه
دول تاخدوهم تشربوا بيهم بتوع الكسب المشروع شاي.. واحنا حننزل مليونية نلم لها تبرعات مدام طلعت غلبانة وفقيرة
احنا اتاكلنا على قفااااااااااااانااااااااااااااااااااااا
يا مصريين احنا اتاكلنااااااااااااااااااااااااااااااااا على قفااااااااااااااااااااااناااااااااااااااااااااا
تحديث:
على فكرة.. احنا لو فضلنا في التوتر ده انا حادخل العناية المركزة، والشعب مش حيبقى له نبض عشان كل شوية تجسوه، ورجالة مصر.... عليه العوض ومنه العوض فيهم.. انا عارفة، مبارك طول عمره بيغير منهم عشان عنده مشاكل
جهاز الكسب غير المشروع افرج عن سوزان مقابل التنازل عن فلوسها؟ واللي برة؟
طيب ومبارك اللي عايز يتنازل عن "املاكه" بروح اهله عشان ياخد اخلاء سبيل هو كمان، طيب وجرائم القتل
مش حينفع كده.. مش حينفع، اساسا كده كده احنا حناخد الفلوس دي، قانون ايه ده اللي بيخلي الناس ترجع الفلوس اللي سرقتها وتطلع تبرطع في الشارع؟
وبعديييييييييييييييييييييييين
قلنا لكم رقبتنا سدادة.. عايزين كام؟



تحديث:
الجزيرة: معلومات مؤكدة عن ضغوط كبيرة من دول الخليج لاطلاق سراح مبارك
طيب يا شباب
البلد محتاجانا
يا مجلسنا العسكري... ما تمشيش ورا دول الخليج
عايزين كام؟
مطلوب بشكل عاجل:
المصريين في الخارج.. تدوا نني عينيكم لمصر
المصريين في الداخل.. تجوع عيالك عشان مصر
حنعمل حملة تبرعات لانقاذ الاقتصاد المصري... وفكك من دول الخليج وحاكم لنا مبارك
كام واحد رقبته سدادة؟ جربونا تعرفونا
تحديث:
هاه... يا مسهل

واحنا في انتظار خبر نفي التسجيل الصوتي لمبارك، او خبر قبول اعتذار مبارك او اساسا فكرة انه ممكن يعتذر
وحنرن لكم الشروق علقة معتبرة... هو احنا عايزين نخرب البيت يعني؟
واحنا عشرين مليون نزلوا في الثورة، كل واحد فيهم كان مستعد يموت عشان مصر، عندكم ازمة اقتصادية؟ عايزين كام؟ عايزين كام من الاخر كده؟
المصريين اللي في الخارج، اللي حيصوتوا طبعا زي ما كلنا عارفين، عايزين يعوضوا انهم ما شاركوش في الثورة، ومستعدين يشحتوا على مصر بربابة
والا انا نتذل لرجال اعمال والامارات والسعودية.. رقبتنا سدادة.. بس راعونا، احنا ام العيال برضه وحننفعكم، ماحدش حينفعكم غيرنا وربنا
وربنا كمان مرة ما حد حينفعكم غيرنا.. وقلبنا ابيض وبنعمل كل حاجة وفول اوبشن، بس ما تطلعوش زعابيبنا عشان احنا فينا اللي مكفينا
اشترونا تكسبوا... ده احنا نسوى وزننا الماظ والله العظيم، اشترونا وبيعوا مبارك واحنا من بكرة... مم بكنة الصمح.. نلم لكم الفلوس اللي انتوا محتاجينها
بس قولوا بس عايزين كام؟
----------------
تحسس وتعتذر
انا موافقة ان مبارك يعتذر لنا ويرجع الفلوس - اللي هم نص ترليون يا حرامي مش 145 مليون بروح اهلك - شريطة ان كل حرامي في السجن بالذات النشالين وهجامين البيوت والحرامية الغلابة دول، يدفعوا اللي عليهم - واتخن واحد فيهم يعني سارق سبعتلاف تلتمية اتنين وعشرين جنيه - ويكتبوا جواب اعتذار ويخرجوا من السجن حالا، ومش بس كده، والشوية اللي قضوها في السجن تتخصم من الفلوس اللي حيدفعوها
بس ده بالنسبة لقضية السرقة فقط
نمسك بقى المصابين
المصابين يتعالجوا على حساب مبارك الخاص، بعد ما يرجع الفلوس اللي عليه، ومبارك وسوزان على رأي الصحف الاسرائيلية "يتنازلوا عن ايه؟ هي كانت فلوسهم؟" ده اسرائيل اللي بتقول كده، صعبنا على الكافر. بعد ما يتنازلوا لنا عن فلوسنا، يعالجوا بقى المصابين على حسابهم من فلوسهم هم، ويدفعوا لهم تعويضات من فلوسهم هم.
كده خلصنا المصابين
نيجي بقى للقتلا
اااااه... بما ان مبارك فاكر نفسه ربنا، وفاكر نفسه فوق المحاسبة، اوكيه، يثبت لنا انه ربنا وانه فوق المحاسبة.... يحيي اللي ماتوا.
وبما انه صاحب معجزات وابو خطوة.. اكيد حيحيي لنا اللي ماتوا
خلاص كده اللي ماتوا؟
اللي اتسرطنوا بقى
ارتفاع الاصابة بالسرطان بنسبة اربعين في المية في الخمستاشر سنة اللي فاتوا
قدامه الحلول الاتية
يعالج اللي اتصابوا بالسرطان برة مصر على حسابه - زي ما هو كان بيتعالج برة مصر على حسابنا - واللي ماتوا بالسرطان يحييهم - ماهو ربنا بقى
او.. بما انه راجل مبروك، يحط ايده على مرضى السرطان ويرقيهم والرقوة تجيب نتيجة وتشفيهم
وكذلك يحيي لنا اللي ماتوا في العبارة - ايوة... عبارة من اللي بيغرقوا دول
واللي ماتوا تحت صخرة الدويقة
واللي انضربوا في الصعيد بالنار واخدوا بصمات الجثث وفتحوا التحقيق - في التمانينيات والتسعينات عشان قالوا بس انه كان كويس واخر عشر سنين بس اللي عك فيهم.. هع
ويرجع للصعيد نفسه اللي اتكسرت
ويكلم اصحابه اللي باع لهم غازنا ببلاش يرجعوا لنا الفلوس على الاقل وبلاش يرجعوا الغاز
ويرجع لنا العمولات اللي كان بياخدها على كل بير بترول مصري بيتصدر
بالنوسبة للفضيحة بتاعة غزة... فاكرين؟ ايام ما الاطفال كانوا بيتحرقوا والناس اكلت وشنا.. احنا عايزينه يعوضنا عن الفضيحة دي، يدفع لنا فلوس مثلا تعويضات على ان الناس كانت بتتف في وشنا عالميا، ويتظاهروا قدام سفارتنا لما انا شخصيا كنت حاموت كمدا
بالنوسبة لفضيحة الجزائر.. اللي وصلت ان واحد صاحبي بعد موضوع الجزائر ده كان في لبنان وبقى يتكلم لهجة خليجي عشان الناس ما تعرفش انه مصري، وواحد صاحبي تاني كان في المغرب - اللي اساسا متخانقين مع الجزائر - وبقى يتكلم فرنساوي عشان الناس ما تعرفش انه مصري من كتر ماهو مكسوف وخايف الناس تمسح بيه البلاط
ولا هو فاكرنا زي شوية المرتزقة اللي حواليه؟ ولا هو فاكرنا زيه وكل همنا الفلوس ومبدأنا في الحياة زيه لما قالوا له السودانيين بيشتموك قالهم "هي الشتيمة بتلزق"؟
فيه حاجة يبدو ان لا هو ولا دلاديله ولا حتى القوات المسلحة واخدين بالهم منها:
احنا شعب اليط بطبعه، وعريان الـ... ويتأمز تأميز ويقول باب الخمارة فين، واقرع ونزهي... والثورة دي كانت عشان كرامتنا واجعانا... مش عشان جعانين، عادي، الجوع بيتقضى، كرامتنا هي اللي مش بتتقضى
وبمناسبة كرامتنا، حيعمل ايه في اللي دخلوا الاقسام بشرفهم خرجوا متمرطين؟
وبمناسبة السودان، حيعمل ايه في تقسيم السودان اللي لولاه ولولا عمر سليمان ما كانش جرا لها اللي جرالها؟ ولا هو فاكر اننا حلاليف زيه ومش سائلين في اللي حوالينا؟ ولا هو ناسي ان السودان بالنسبة لنا ايه واحساسنا بيها ايه؟
"ومصر الرياض وسودانها عيون الرياض وخلجانها، وما هو ماء ولكنه وريد الحياة وشريانها، تتمم مصر ينابيعه كما تمم العين إنسانها"
وبمناسبة ينابيعه... حيرجع لنا المية اللي باعها وخلانا دلوقت متوقعين في عرض اثيوبيا ازاي؟ خلاص... المية ترجع لنا من غير ما نتوقع في عرض اثيوبيا واحنا نسامحه.
لما امبارح كنت في الندوة بتاعة القوات المسلحة، عاملين البرزنتيشن وحاطين كل اسباب الثورة... الا السبب الرئيسي: كرامتنا.
طب وربنا.. وربنا.. وربنا كمان مرة، تلاتة بالله العظيم تلاتة بالله العظيم تلاتة بالله العظيم، قسما بأغلظ الايمان، يمين احاسب عليه امام الله، ان السبب الرئيسي اللي قوم الثورة دي هو كرامتنا
واللي مش مصدقني يقول لي ايه تفسير الآتي:
يوم 25 اول ما الناس اتجمعت في الميدان الهتاف الاول قبل الشعب يريد اسقاط النظام كان:
لسه فيكي رجالة يا مصر.. لسه فيكي رجالة يا مصر
بكام دي يا مبارك؟ بكام انك وحسست رجالتنا اللي اهيف واحد فيهم ضفره برقبة عشرة منك انهم مش رجالة، ولما اكتشفوا انهم رجالة قعدوا يعيطوا؟
يوم 28 يناير.. كربلاء المصرية:
بعد ما ضربنا الامن في ميدان الدقي بقينا ماشيين ناحية كوبري قصر النيل والهتاف كان: قنابل على مين ده احنا المصريين.
بكام دي يا مبارك؟ بكام انك كسفتنا من اننا مصريين وبقينا بندور جوة نفسنا على اي حاجة عشان نرجع ثقتنا في نفسنا؟
بكام الشباب اللي كان ماشي صف ناحية الرصاص عشان يثبت للعالم انهم رجالة، ولما الضرب يزيد والشباب غصب عنهم يجروا البنات تتقدم عشان تنغز الشباب في نخوتهم وما كانش ناقص غير يغنوا: يا قوم الام وحتام ان تقبلوا نعانق ونفرش النمارق
واول ما نلاقيهم بيجروا نقف صف وايدينا في ايدين بعض واحنا عمالين نصرخ فيهم: ما تجروووووش ما تجروووووش لو جريتوا احنا حنتقدم... ونروح ماشيين كلنا - كل الستات والبنات، بلا اي اتفاق والله العظيم بنفس الخطوة كأننا فرقة رضا - ناحية الرصاص، يروحوا راجعين الشباب على الرصاص فورا
موتنا رجالتنا الله يخرب بيتك... موتناهم عشان نشوفهم رجالة
كل الدم ده نزف عشان كرامتنا واجعانا وعايزين نثبت لنفسنا اننا عندنا رجالة.. وكان ممكن الشباب يجري وينفد بعمره، بس كرامتهم كانت اهم من حياتهم
يوم 2 فبراير بعد هزيمة بلطجية مبارك كان الهتاف:
ارفع راسك فوووق انت مصري
بكام دي يا مبارك؟ بكام انك نكست راسنا وكسرت نفسنا، ولما اكتشفنا اننا جدعان قوي، شباب وبنات، بقينا نصرخ للعالم ونقولهم: احنا رفعنا راسنا؟
يوم 11 فبراير كان الهتاف:
اهم اهم اهم.. المصريين اهم
ايه يا راجل.. ايه راجل؟ ايه يا راااااااااااااجل؟ يخرب بيت امك يا شيخ
يخرب بيت امككككك... خليت الشباب يموت نفسه عشان عايز يتأكد انه لسه راجل، خليت ستات مصر تزق رجالتها في النار عشان يشوفوهم رجالة... يخرب بيت امك
تسوى كام دي؟
واخدين بالكم يا قواتنا المسلحة؟
واخدين بالكم؟ احنا عملنا اللي انتوا حلفتوا يمين عشان تعملوه وما عملتوهوش.. احنا برينا بقسمكم بدالكم عشان ما يتقالش ان مصر مافيهاش رجالة
واخرتها... مدخلين لمبارك في سجنه مسجل وبتقولوا لنا سامحوه
كتر خيرنا اننا سامحناكم وانتوا بتتفرجوا علينا واحنا بننضرب يوم اتنين فبراير وانتوا ما اتدخلتوش... ما تسكتوا بقى وتبطلوا تحربوا على خرابها؟ هو لوي دراع ولا ايه؟
فتنة طائفية
فلتان امني
ازمة سولار
تهديد بكارثة اقتصادية
والمشهد الاخير: مبارك عايز يعتذر ويرجع الفلوس
لا والنبي؟
لا والنبيييييي
وبعديييييييييييييييين وبعديييييييييييييييييييين... للصبر حدوووووود
يعني احنا جزاتنا اننا عملنا عبط؟ ادي اخرة الدلع، فضلنا نبوس ونطبطب ونحايل ونهشتك والجيش والشعب ايد واحدة، ومعلش، انزلوا لهم في مليونية عشان ترفعوا عنهم الحرج، ومعلش، ما حموناش يوم 2 فبراير ماهم كتر خيرهم جالهم امر يقتلونا وما قتلوناش، ومعلش فضونا بالقوة اصلهم ملبوخين، ومعلش ومعلش ومعلش
وبعدين.. وبعدييييين.. اتقي شر الحليم
هي حصلت؟
دي اخرتها؟ هو فيه كده يا ناس؟ ده انا كنت باكتب للناس في المدونة: احنا نازلين وفيه تهديدات من قناصة انهم يضربوا على قواتنا المسلحة، والعيال يكتبوا لي في التعليق: احنا نحمي قواتنا المسلحة بارواحنا، ونموت كلنا قبل ما حد فيهم يتخدش
ونحل لكم امن الدولة بايدنا وانتوا واقفين تتفرجوا على قناصتهم وهم بيضربونا ونخش نجيب لكم الوثائق ونسلمها لكم
ونأمن لكم البلد بايدينا ونعمل لجان شعبية واللي نظبطه نقبض عليه ونسلمه لكم
ونقف لكم قدام السعودية والامارات واسرائيل بنفسنا وننزل لكم مليونية ودماغنا تتقور في الشمس عشان نرفع عنكم الحرج ونجيب لكم مبارك تحاكموه
ونمسح ونكنس ونطبخ ونغسل ونعصر وننشر ونكوي ونطبق الهدوم ونستفها في الدواليب ونقول لكم: تسلم يا سيد الرجالة.. الله
الله..
جرا ايه بقى؟
جرا ايه؟
ما تلايموها بقى، ده كتييييير.. كتييييييييييييير، كده اووووووووووووووفرررررررررررررر
انا مش عايزة اسمع حس الموكوس ده في اي تسجيل صوتي
مش عايزة اسمع نفسه
والا بقى اللي دخل له التسجيل في سجنه واللي سرب له التسجيل واللي نشر له التسجيل وهو في السجن ومش قانوني انه يسجل اي حاجة ويأثر على مجريات التحقيق كلهم يتجابوا بقى
كلهم يتجابوا... اي واحد متورط في تسريب تسجيل صوتي لمبارك وهو قيد التحقيق للتأثير على مجرى القانون يتجاب مهما علا شأنه، ويتحاكم، والمحاكمة بقى تجيب محاكمة ويتفتح كل اللي احنا عاملين عبط عليه
قلتوا ايه؟
عقلكوا في راسكوا تعرفوا خلاصكوا... انا مستنية تكذيب بقى لموضوع اعتذار مبارك ده، وما عندناش مانع نتخانق مع الشروق ونقول لها يا كدابة يا كدابة يا ثورة مضادة.. وهي مش حتزعل.. هاه؟ فيه اكتر من كده؟
يا تطلقوا مبارك يا تطلقونا... انما تتجوزوا علينا وكمان نصرف عليكم وعليه؟
وبالمناسبة بقى طلعوا لنا الـ186 عيل اللي انتوا عايزين تحبسوهم عشان اسرائيل
ايه يا اخواتي ده؟ ده ولا كأن مبارك لسه بيحكم
القوافل تتمنع
واللي يتظاهر قدام سفارة اسرائيل يتحبس
الله الله الله
هي بقت كده؟
طااااب بقى.. احنا نازلين يوم 27 مايو الجاي، وحناخد في ايدنا الجرحى باهاليهم، واهالي الشهدا كلهم، واصحابهم وقرايبهم وجيرانهم، شوفوا بقى يعملوا كام دول
ان كان شعبك عسل ما تلحسوش كله..
احنا صبرنا عليكوا كتير، حقنا راجع في التحرير
Posted by جبهة التهييس الشعبية at 13:40 191 comments
Labels: 25 يناير
Monday, 16 May 2011
محضر الجلسة لندوة المجلس الاعلى للقوات المسلحة

تحديث:
نسيت اقولكم كمان ان محمد صبحي قال: انا منزعج جدا من المطالبة بحل مباحث امن الدولة، كل دولة لازمها امن
:

نسيت اقولكم كمان ان محمد صبحي قال: انا منزعج جدا من المطالبة بحل مباحث امن الدولة، كل دولة لازمها امن ملحوظة:رجاء قراءة الجزء السابق اولا وهو بأعلى هذا الجزء
تحديث:
اه.. نسيت اقولكم، اخو هشام طلعت مصطفى قعد يقول: انا زعلان على بلدي، ونفسي اساعدها، بس انا خايف اتحول للنائب العام.. ومن ضمن الكلام اللي قلته وانا نسيت اكتبه، اني قلت تعليقا على الكلام ده: على فكرة احنا مش عايزين نتذل لحد، وماحدش يقول لي ان القانون والعدالة بيعطلوا الاقتصاد، احنا نزلنا في الثورة عشرين مليون، ومستعدين نتطوع في اي عمل عشان نحمي اقتصاد بلدنا ولا ان رجال الاعمال الفاسدين اللي خايفين من القانون والامارات يذلونا ويجبرونا اننا ما نحاكمش الفاسدين، وعلى فكرة احنا مش بنقبض بالدولار ولا بناكل كنتكاي
وحسين عبد الغني قال اللي عايز يشتغل بالقانون اهلا وسهلا بيه، اللي مش عايز بالسلامة
بسم الله الرحمن الرحيم يا رب ما انساش اي حاجة ابدا
ابتدت بأن اللواء محمود نصر عضو المجلس العسكري قال: نود التأكيد على ان المجلس العسكري يعترف بشرعية ثورة 25 يناير، واستعرض الحالة الاقتصادية بالارقام، واخد وقت بتاع ساعة كده، وفيه بريزينتيشن ان شاء الله احاول اخدها منهم عشان انشرها، وقال ان فيه ازمة اقتصادية، بس انا متفائل بروح الثورة، لكن عندنا مشاكل آنية، واحنا مجتمعين مع حضراتكم عشان نسمع اقتراحاتكم وافكاركم غير التقليدية لحل الازمة الاقتصادية الحالية، احنا جيش.. دي اول مرة نحكم بلد، ومحتاجين مساعدتكم، ما اتحطيناش في الموقف ده قبل كده.
بعدين اتكلم حسب الله الكفراوي الكلام بتاعه ده، وقعد يترحم على السادات، والحقيقة ما خلصش كلام، وبعدين اتكلم بعديه واحد مش فاكراه، وقال كلام مش مهم ابدا ابدا ابدا، البتة يعني، بعدين د. ابو العلا ماضي اتكلم في مقترحات اقتصادية، وبعدين واحد مش عارفاه قعد يحط خطة خمسية ويتكلم في التفاصيل، فالدكتور جلال امين اتغاظ وقال ده كلام مش مهم ابدا، راح اللوا ما صدق وقال فعلا كلام مش مهم، واحنا عندنا في القوات المسلحة لما بنقول حنتكلم خمس دقايق يبقى هم الخمس دقايق مش تلت ساعة، احنا مش طالبين خطة خمسية، عارفينها احنا الخطط دي، احنا عايزين حلول آنية تسعف الحالة الاقتصادية بشكل آني. بعدين اتكلم طلعت السادات واعوذ بالله.. اعوذ بالله وربنا، تقولش السادات يبعث من جديد؟ رغي رغي رغي، ورايش كله.. وفاكر نفسه بيتكلم في مجلس الشعب وقعد يقول: افتح يا راجل.. افتح.. اه وربنا قال كده، راح اللوا بص له وهو مش فاهم كده، راح قايل: افتح لي الاستثمارات، خلاص.. الحبيب العدلي مشي، ما تقعدش تاخد فلوس من المستثمرين، افتح افتح افتح.. هو حيجيبه من برة؟ وواحد من الاخوان اتكلم وقعد يقول في ارقام ويشكك في الارقام اللي طرحها المجلس العسكري فاللواء قال له الارقام دي دقيقة وممضي عليها وانا حاجيب لك التقرير. وعماد اديب كان قاعد جنبي قال: هو ده بقى اقتصاد الاخوان.. مافيش فكر خالص!
كل ده وانا رايحة وجاية على واحد كده اكتشفت انه مدير الاوتيل في الاخر، وقلت له انا مفوضة من حوالي 250 واحد على المدونة والتويتر اني اوصل صوتهم للمجلس هنا، ولازم اتكلم ودول مش بيسكتوا، راح مقعدني قدام عشان ييجي الدور عليا بدري، اصلهم كانوا بيتكلموا بالدور، ورحت باعتة للواء ورقة بالمعنى ده، وقلت له يا تخليني اقرا النقط اللي معايا يا اكتبها لك في ورقة، راح باصص لي وانا رافعة ايدي وقال: دي نوارة؟ نصقف لها يا جماعة عشان دي من شباب الثورة العظيمة ماحدش صقف غير حسين عبد الغني وجلال امين وابو العلا ماضي. فيه حد تالت اتكلم برضه عارفين مين؟ عميد كلية الاعلام اللي بلال فضل شطفه على اون تي في، قعد يقول لازم تواجهوا الاعتصامات الفئوية بكل حسم وحزم، وبعدين عادل حمودة اتكلم بعده وقال: انا اللي كشفت فساد داماك، لكن احنا محتاجين دلوقت ان اي رجل اعمال دفع رشوة لمسئول المسئول هو اللي يتحاسب ورجل الاعمال ما يتحاسبش والا الاستمثارات حنخسرها، قام اللواء قال: والله انا عارف الكلام ده، بس الناس مصرة على المحاكمات، واحنا ما نقدرش نتدخل في القضاء، لكن مثلا الامارات لما لقت اننا بنحاسب بتوع داماك قالوا بتعملوا في الناس بتوعنا كده؟ طب مافيش استثمارات، واحنا محتاجين الاستثمارات دي بشكل ملح والا الاقتصاد حينهار. وبعدين اللواء قال لي تعالي يا نوارة اطلعي هنا وكلميهم... وراح مشاور عليا وهو مبتسم: دي من بتوع الثورة، لازم نكرمها
فقلت لهم الآتي بالنص:
انا مش عايزة اتكرم ولا حاجة انا قبل ما اجي نزلت على المدونة والتويتر اني جاية هنا وفيه حوالي 250 واحد وكلوني اقول الكلام ده، وانا الثوار بيقولوا عليا "نوارة عميلة الجيش المصري" وانا مش زعلانة من اللقب ده لاني باحب الجيش، ولو اني عمري ما قعدت مع ظابط جيش غير واحد من سنتين كان بيحبني وما حصلش نصيب، الكلام عن الازمة الاقتصادية اللي كلنا عارفين اسبابها ومافيش داعي للاستفاضة فيها والشباب بيقولوا ان عشان الازمة الاقتصادية تتحل نوفر فلوس الداخلية، الامن المركزي على سبيل المثال امبارح ضرب المتظاهرين بالقنابل المسيلة للدموع والرصاص المطاطي والخرطوش، بعد غياب من يوم 28 اول ظهور للشرطة كان وهي بتحمي السفارة الاسرائيلي من متظاهرين مصريين، اذا كان الناس دي عقيدتهم ان الشعب هو العدو وان مهمتها تحمي اسرائيل يبقى ادوهم اعانة بطالة وفيه تسعة مليون عاطل مستعدين يخدموا بلدهم وولاءهم للوطن وللشعب مش لاسرائيل. امبارح اللواء فاروق لاشين المتهم بضرب المتظاهرين اثناء الثورة واللي بعد كده بقى محافظ الجيزة كان بيقود معركة ضد المصريين لحماية السفارة الاسرائيلي، والامن الوطني لسه بيشتغل ضد الناس.
الحالة الاقتصادية عشان تتحسن لازم الناس تستعيد الثقة مع المجلس العسكري، انا عايزة اوضح ان انتوا دايما بتفهمونا غلط، ودايما بتعتبرونا بنشتمكم، احنا لو ما كانش لنا عشم في القوات المسلحة المصرية ما كناش هاجمنا ولا اتكلمنا، كنا عملنا زي ما عملنا مع الامن المركزي، احنا بصراحة بنحتقر امن الدولة والامن المركزي، لكن بنحب الجيش المصري، والاثر النفسي لتعذيب الجيش المصري للمتظاهرين اقوى بكتير من الاثر البدني، لازم تبطلوا تضربونا، ولازم الثقة ترجع، وعشان ترجع يجب الافراج عن كل المعتقلين، واعادة المحاكمات العسكرية، ورفع كل القيود عن وسائل الاعلام.
فيه حاجات كمان بتكلف الدولة فلوس وبتساعد على انتشار الفساد وده بيهدد الحالة الاقتصادية، زي المجالس المحلية، وزي المحافظين اللي لازم يبقوا بالانتخاب، وانتخاب عمداء ورؤساء الجامعات، وعشان الامن يرجع لازم يتحاكم ضباط الشرطة المتورطين في ضرب المتظاهرين.
(في الحتة دي طلع جوز نسوان قالوا: ما تخلصي بقى.. احنا مش عايزين نسمع الكلام ده، فاللواء محمود قال: لا.. سيبوها تكمل وتفضفض.. قلت له: انا مش بافضفض، انا جاية لك بتفويض من اكتر من 250 مواطن وانا لخصت كلامهم دي معجزة)
لازم يتم اتخاذ موقف حاسم من الشرطة، فاللواء قال لي: بس احنا مش ثوار، احنا جيش، يعني ما بنفهمش غير في ضرب الرصاص. قلت له: ليه كده يا سيادة اللواء، ده الجيش والشعب ايد واحدة. فالجدع بتاع جمعية جمال مبارك قال لي: والشرطة والشعب والجيش ايد واحدة. قلت له: لا انا اسفة، الشرطة هربت من واجبها من يوم 28 واول ظهور لها كانت بتحمي السفارة الاسرائيلية وبتضرب المصريين بالنار، تاني؟ بعد كل اللي حصل ده تاني؟ احنا مش حنقبل تاني ده يحصل.
ولازم يبقى فيه شفافية، حضرتك قلت في كلمتك ان فيه اجندات خارجية وداخلية بتهدد الثورة وعايزة تفشلها، يا ريت تقول لنا ده مين، صارحونا، احنا في ضهركم ونعرف نحميكم، لأن عدم مصارحتكم لينا بتحطكم في موقف محرج، وبتخلي الناس تتهمكم انتوا، بالنسبة للاعتصامات الفئوية اللي كانوا بيقولوا عليها الزملا هنا عاملوها بكل حزم، الحزم الوحيد المقبول في حل الاعتصامات الفئوية هو حد اقصى وحد ادنى للاجور، بقى عايزين تتسامحوا مع رجال الاعمال اللي نهبوا مليارات وعايزين تتعاملوا بكل حسم مع عامل بياخد 400 جنيه؟ اعمل حد اقصى وحد ادنى للاجور وده مش حيكلفك لانك حتعيد هيكلة الوظائف والاجور من جوة المؤسسة وساعتها مش حتلاقي اعتصامات فئوية، لكن انا ما اقدرش اطلب من عامل بعد ما بات في الميدان 18 يوم انه يفضل يقبض 400 جنيه ويسكت. وبعدين قانون منع التظاهر ده مش عملي، وبينهك الشعب والجيش، لأن لا الشعب حيبطل يتظاهر، ولا الجيش حيبطل يضربهم طول ما فيه القانون ده، الغي القانون لانه منهك، وهو اللي بيعطل الانتاج، لان التعامل الامني بيخلي الناس تعند وتكمل اعتصام مش بتمشي، ثم طالبين نلغي التظاهر واصلا مافيش حاجة بيتم انجازها من غير مليونيات.
الفتنة الطائفية اللي برضه بتعطل الاقتصاد مش حتتحل بالعرفي ولا بفض الاعتصامات، حتتحل بقانون دور العبادة الموحد وقوانين للمواطنة، والعدالة كمان كفيلة بانها تعيد الثقة بين الناس والجيش، مش معقولة ابراهيم كامل يبقى اول واحد ياخد براءة قدام محكمة عسكرية وعمرو البحيري ياخد خمس سنين وعايزين الناس تسمع الكلام. لازم يتم تحديد جدول زمني لتسليم السلطة لان الضبابية دي بتصيب الناس بالقلق، والناس القلقانة مش بتشتغل. واستمرار امن الدولة بيئذي البلد.. هم اللي بيعملوا الفتنة الطائفية، وهم اللي بيبعتوا البلطجية، لازم يبقوا تحت اشراف قضائي وحقوقي، واخلاء سبيل ضباط الشرطة المتورطين في التعذيب وضرب المتظاهرين عمره ما حيعيد الامن ابدا، ده حيزود الانفلات الامني.
فيه ثروة بشرية اسمها العشوائيات، دي ممكن تدخل دخل للبلد، يعملوا ريسايكل للزبالة، مشاريع غزل ونسيج، بس هم مش عايشين في امان، هم مش بلطجية، البلطجية الهربانين من السجون هم اللي بيهجموا عليهم والشرطة العسكرية مش بتسأل فيهم والامن مش بيحميهم، فيه حاجة كمان حتفيد الاقتصاد: محاكمة اعضاء الحزب الوطني المتورطين في الفساد، الناس دي احنا محتاجين فلوسهم مش يتسابوا كده.
الاعلام مهم جدا للتواصل مع الناس، وفيه ناس مدربة على النفاق حتى لو ما جلهاش اوامر، لازم السياسة نفسها تتغير. وما ينفعش حل مشاكل الطائفية بناس مثيري الطائفية زي محمد حسان، ويحيى الجمل دوره ايه في الحياة؟ بيعمل ايه يعني؟
(اللي في القاعة: تؤ تؤ تؤ.. بس بقى.. اللواء: سيبوها تكمل)
الحوار الوطني اعضاؤه غير منتخبين وما يمثلوش الناس، مجلس الشورى مالوش لازمة لانه مصروف على الفاضي، وزير الداخلية لازم يبقى مدني عشان يحافظ على حقوق المدنيين ما يبقاش عقلية بوليسية.
اخيرا فيه كام حاجة لو اتعملوا الناس حترتاح والاوضاع حتتحسن:
- المخلوع يروح سجن طرة بدل ما احنا بنصرف عليه ما يروح مستشفى طرة، يعني ايه مش مناسبة له؟ ما هو اللي عاملها للناس يدوق اللي هو عمله للناس
(الناس اللي في القاعة: اففففففففففففففف تؤ تؤ تؤ)
- اعادة هيكلة المؤسسات واجورها
- تغيير المحليات والمحافظين يبقوا بالانتخاب
- مافيش اعتصامات تتفض تاني بقى.. لا بالقوة ولا بالذوق، الاعتصام يتفض بالاستجابة للمطالب، ماحدش يمد ايده على المصريين
واللي اتقبض عليهم يطلعوا كلهم
-------------------
طبعا حتسألوني فاكرة الكلام ده كله ازاي، حاقولكم لاني كاتبة النقط على الكمبيوتر وطبعتها، فافتكرت كلام، وفيه نقط كتبتها في الجلسة افتكرت بعضها، والبعض الاخر مش فاكراه، زي ان في الاخر فيه نقطة خامسة مش فاكراها، بس فاكرة اني وانا راجعة مكاني واحدة محجبة وحاطة برنيطة على حجابها قالت لي: انتوا زودتوها قوي
اللواء محمود قال: طبعا احنا بنحييها لانها من شباب الثورة.. بس انا مش فاهم حاجة خالص، واكيد فيه ناس من الحضور ممكن يتكلموا مع الشباب ويفهموهم اكتر مني، لاني مش عارف افهم هم بيفكروا ازاي؟
!!!!!!!!!!!
بعدين قام الراجل اللي من جمعية جمال مبارك، واللي فضحه كان حسين عبد الغني، اول ما قال انا من جمعية شباب مش عارفة ايه راح حسين عبد الغني معلي صوته وقال: دي بتاعة جمال مبارك
الراجل ده قال: لازم يبقى فيه حسم وحزم في التعامل الامني.. فاللواء قال له: يعني ايه حزم بقى وحسم، فهموني عشان احنا جيش، يعني اول ما تقول حسم وحزم نفهم انك بتقول اضربوا بالنار
فقال له: اضرب بالنار
فاللواء قال له: نضرب بالنار؟
فجلال امين وحسين عبد الغني وانا وابو العلا ماضي وكام حد تانيين قالوا: لا لا لا.. وبعدين قلت له: او نجرب فيك يا استاذ.. انت اول واحد ينضرب بالنار، وحسين عبد الغني قال له: احنا مش محتاجين ناس فاشيست زيك
بعدها محمد صبحي اتكلم وقال: احنا كلنا ضد اسرائيل بس احنا مش عايزين ناس تحطنا في مواجهة مع اسرائيل زي اللي راحوا يقتحموا السفارة امبارح، راح اغلب اللي قاعدين صقفوا. وبعدين قال لازم يبقى فيه حسم وحزم، اي بلطجي يقتحم قسم اي بلطجي يعتدي على الناس اضرب بالنار فورا (تصفيق من القاعة) واي حد يعمل فتنة طائفية ياخد اعدام شنقا، ست شهور بس الفتنة دي حتخلص (تصفيق من القاعة). رحت باصة للظباط اللي واقفين ورايا وقلت لهم: انتوا عايزين تقتلونا؟ راح واحد منهم قالي: هو انت بتقتحمي قسم؟ قلت له: احيي بلطجي ولا تقتل بريء.. راح ساكت.
بعد شوية جه مدير الاوتيل - هو ظابط جيش او مخابرات عسكرية ما اعرفش عشان لابس مدني - وقعد جنبي وقعد يرسم لي على الورقة ويقول لي انا عندي شقة، جبت كهربا بعشرتلاف جنيه، وما دفعتهمش، ده اسمه الدين الخارجي، جبت مقاول يشطب لي الشقة بميت الف جنيه، وما دفعتهمش، ده اسمه الدين الداخلي وبعدين سبت لمراتي 20 جنيه عشان تدفع فاتورة الكهربا، هو ده الاحتياطي بتاعنا. نعمل ايه؟ قلت له ايه الناس الفاشيست اللي انتوا جايبينهم دول؟ هم دول بقى اللي قلبوكوا علينا بعد ما كان الجيش والشعب ايد واحدة؟ قال لي: كل واحد فيهم كان بتاع مبارك واستفاد من مبارك ودلوقت جاي بيتكلم عن الثورة، عشان كده باحب ابوكي، عشان هو اللي شتم مبارك في وجوده، مش زي عبد الرحمن الابنودي اللي كان بيبوس ايد مبارك واول ما مشي عمل ثوري.. فماندي فهمي قالت له: طب ما انتوا اللي داعيينهم. قالها: نعمل ايه؟ احنا محتاجين مساعدة الناس، عايزين حد يحط لنا خطة كويسة عشان نجتاز المرحلة دي. قلت له: لو كان فيه خير ما كان رماه الطير، لو دول بيعرفوا يحطوا خطط ما كانش مبارك سقط.. اداني ورقة وقلم وقال لي: خدي اكتبي لي اسماء الناس اللي ندعيهم الاجتماع الجاي.. احنا خلاص ما بقيناش عارفين انتوا عايزين مننا ايه؟
كتبت كل اللي موجودين على الفون بوك بتاعي
ولما يتصلوا بيكوا روحوا
روح يا اخويا منك لها له.. روحوا واتكلموا وقولوا كل حاجة.. ده جيش مصر يعني، ولا ما يشبهش الفريدم هاوس، والمعهد الديمقراطي، والسفارة الامريكاني، وفريدريش ناومان، والسفارة التركي، وكود بينك، والبوسنة، والهند والسند وبلاد تركب الافيال، ما بتقعدوا مع طوب الارض ولما بنكلمكم بتقولوا: مش مهم انا رحت فين؟ المهم انا باقول ايه.. هو ده كان جيش اسرائيل؟ تسعين في المية من اللي راحوا الاجتماع ده راحوا عشان يلحسوا الجزم يمكن المجلس العسكري يرمي لهم عضمة يقرقشوا فيها، وكل اللي نازل عليهم: اضربوهم، احرقوهم، موتوهم، انسفوهم... لو نص العدد ده كان ناس عندها ربع انسانية السياسة اللي مضايقانا حتتغير، ذنب اللي حيموت بعد كده في رقبتكم لو ما رحتوش.. اديني باقولكم، الاغلبية اللي بترضى تروح بتحرض على قتلنا وش
انا كتبت كل اللي اعرفهم.. واللي حتجيله دعوة ومش حيروح حسبي الله ونعم الوكيل فيه، واللي حيروح ومش حيقول كل اللي في بطنه حسبي الله ونعم الوكيل فيه
حسين عبد الغني اتكلم كلام رائع، وركز على نقطة اساسية: انا شايف ان كل اللي بيتكلموا مسميين الثورة "الكارثة اللي حصلت" مافيش كارثة حصلت.. فيه ثورة عظيمة حصلت، ومافيش ازمة، ومافيش مصيبة حتحصل، الشرطة بتعاقب الشعب، وده مش مقبول.. راحت برضه واحدة كده طالعة لوحدها وقالت له: بس بقى.. خلص
راح شاخط فيها وقالها: هو انت مديرة الجلسة ولا سيادة اللوا؟
وراح مكمل كلامه، وقال ان فض الاعتصامات بالطريقة دي مش مقبول، واننا بنحب القوات المسلحة، لكن لو سمحتوا اسمعونا، كده الرصيد خلص، واذا ما كانش عقول ثورية هي اللي تدير المرحلة دي البلد مش حتمر بامان، ماحدش يعند مع الناس.
جلال امين قال نفس الكلام تقريبا، بس قال ان ده مش وقت الحد الادنى للاجور، لكن ممكن نرفع الاجر بشكل مؤقت لحين استصدار قانون بالحد الادنى للاجور.
اه نسيت.. ابو العلا ماضي اتكلم عن الضريبة التصاعدية.
وبعدين قالوا لنا تعالوا على الغدا:
رحنا على الغدا، لقيت اللواء محمود بيقول فين نوارة؟ انا عايز اقعد جنبها.. انا جاي اقعد جنبك بقى عشان افهم انتوا بتفكروا ازاي؟ اصل احنا عايزين نفهمكم، هو انتوا ليه مش كلكم حاجة واحدة؟ فيه ستميت ائتلاف، واحنا مش عارفين نكلم مين، يعني انت مثلا تبع مين؟ قلت له انا مش تبع حد، قال لي: شوفتي؟ اهو احنا بقى مش عارفين نتعامل كده.. كل شوية حركة وائتلاف وحزب لما دوخنا
قلت له: بس دي حاجة كويسة.. دي حرية
قال لي: ماشي.. بس احنا مش فاهمين منكم حاجة، وعلى طول انتوا زعلانين
فمدير الاوتيل الظابط قال له: هم بيحبوا بلدهم، وعايزينها احسن بلد، بس الظاهر فيه مشكلة تواصل بينا وبينهم، يعني مثلا انا باشوف ناس بتعمل كروت ويكتب فيها: فلان الفلاني.. ثورة 25 يناير.
(حقة فيه حد بيعمل كده؟)
وبعدين جات الولية ام برنيطة وقعدت تاكل في دماغه لحد ما احد الظباط قالها: هو عايز ياكل.. فراحت باصة لي ومتخانقة معايا تاني وقالت لي: انتوا زودوتها.. وراحت باصة للواء وقالت له: دول عايزين يمشوا البلد على كيفهم، هم مين عشان يتكلموا نيابة عن الشعب، وتبص لي: لعلمك يا حبيبتي، انا باحضر هنا من زمان.. والظباط واقفين يضحكوا وانا مذهولة، قلت لها: انت بتحرضي علينا؟ قالت لي: ايوة باحرض عليكم
وبعدين قلت للواء: لو سمحت كفاية ضرب، وبلاش اعتقالات، وافرجوا عن المعتقلين.. فقال لي: حاضر... واللي اخدوا محاكمات عسكرية حتتعاد محاكمتهم وحتى الظباط اللي اعتصموا، المفروض ياخدوا اعدام، بس مش حنديهم اعدام عشان البلد في حالة استثنائية. قلت له: ده فيه تلاتة منهم ماتوا. قال لي: والله العظيم مافي حد مات منهم، والله العظيم ما في حد مات منهم، والله العظيم ما في حد مات منهم.. وبعدين برضه اتلمت عليه شوية نسوان قعدوا ياكلوا في دماغه، لقيت ظابط صغير كده، مش حاقول رتبته، اولا عشان مش بافهم في الرتب، ثانيا مش حاقول كان على كتفه ايه عشان ما يتئذيش، ثالثا: الشهادة لله مز يعني، حرام يروح في داهية
مال عليا وشوشني وقال لي: انت عارفة اللي حصل مع العيال بتوع سفارة اسرائيل امبارح؟ دول مقبوض على شوية منهم ومتوجه لهم تهم انهم حاولوا يقتحموا السفارة واتلاف منشآت عامة وممكن يروحوا في داهية
قلت له: مش صحيح، دول عشان يقتحموا السفارة لازم يطلعوا في الاسانسير، كل اللي عملوه انهم زقوا الحاجز، وكانوا بيتكلموا مع الجيش عشان ينكس لهم علم اسرائيل وهم بيتكلموا فوجئوا بالامن المركزي بيضرب
فقال لي: طيب كلمي اللواء محمود عنهم.. وخدي منه وعد يطلعهم
قلت للواء محمود: انا مش حاكل الا لما انت تقعد، اول ما قعد قلت له: فيه عيال مقبوض عليها امبارح، يعني ما بقاش الا يتحاكموا عشان اسرائيل.. قال لي: ما كانوا حيخربوا الدنيا امبارح. قلت له: لا مش صحيح.. طلعوهم لو سمحت.. فقال لي: ربنا يسهل ان شاء الله
وبعدين جات ست كده قعدت تاكل في دماغه وعايزة تعمل معاه حوار، قال لها: لا.. انا مش قادر اتكلم انا بالنسبة لي نوارة اهم عشان عايز افهم شباب الثورة.. فضلت تكاكي وتاكل في دماغه وتشتمني انا وشباب الثورة في وشنا
وبعدين هنج خالص وبقى شكله تعبان، فقلت له شكلك تعبان مش حينفع نتكلم، فمدير الاوتيل قال له: هي كتبت لنا قائمة بالناس اللي ندعيهم وربنا يسهل، هي مش عاجبها اللي حضروا النهاردة وبتقول انهم ثورة مضادة.
وبعدين سلمت عليهم ومشيت
بس خلاص
-------
احنا حنعمل ايه؟
حنعمل حشد لقضايا الاجماع الوطني.. ما عادش ننزل الجمع باعداد قليلة ابدا
نمسك قضايا الاجماع الوطني قضية قضية
ونرجع الجمع لقوتها تاني.. غلطنا جدا اننا سبنا الشارع
وغلطنا جدا اننا فتحنا مواضيع بعيدة عن الاجماع الوطني تخلي شكلنا عار في الميدان
وغلطنا جدا اننا كنا مش بنروح نقابلهم ونقولهم اللي في نفسنا
وانا من ضمن اللي غلطوا
بس طبعا مش عشرين مليون حيقابلوهم
لكن على الاقل مليون واحد ينزلوا في قضايا الاجماع الوطني
ونعمل مؤتمرات شعبية
مؤتمرات شعبية ومليونيات.. مارشات عسكرية وقرآن
وربنا يستر
بس على فكرة.. البلد مليانة زبالة.. وياما زبالات لابسة بدل وبرانيط

قرأت كل كلام نوارة نجم ولم استطع ان اكمل قراءة مقالة بلال فضل
وتعليقى السريع ان عدم النزول يوم الجمعة الجاية يعتبر خيانة للأمانة
واننى اتمنى من الله ان يعلم الجميع ان البلد امانة فى اعناقهم وان عيب
جدا تبقى الكلمات منزوعة من بين ضلوع نوارة بمثل هذا الاسى ونظل
كما كنا متفرجين
اما الشئ الغريب اننى كنت اتصور ان من السهل الكتابة من القلب
واكتشفت ان الكتابة من القلب عمل آخر صعب صعب صعب لو تعلمون

انا اللي قدرت اخرج بيه ان المجلس العسكري في وادي والشباب في وادي اخر
وانهم فعلا جيش كل اللي يعرفوا هو ضرب النار في الجبهه وللأسف من الواضح ان زبانيه الحزب الوطني قدرت تخترق اجتماعتهم وبيفهموهم انهم همه اللي عندهم حل كل المشاكل وطبعا المجلس مش عارف مين الصادق ومين الكداب لانهم فعلا احنا جبناهم من الدار للنار
ومايعرفوش اساليب الشياطين دول وشباب الثوره للأسف اتأخر قوي وكان من المفروض همه اللي يكونوا موجودين في كل اجتماعات المجلس العسكري ومايدوش للكلاب بتوع النظام السابق فرصه للأستحواز علي اجتماعات المجلس العسكري
ياتري انا فهمت صح ولا ايه
ويوم 27 مايو المفروض ماحدش يهتف ضد المجلس العسكري ابدا علشان مانديش للشياطين فرصه يستقوا بيها عند المجلس العسكري
وربنا يستر علي البلد وعلي شعبها الطيب
فاطمة فيصل

يا رب الناس تفهم

أخي الحبيب العادل
أنا قرأت بعض من المقالة لإنها طويلة جداً وبصراحة لم يكن عندي وقت لقرأتها كاملة.
ولكن أنا مع الذين يعطون فرصة للمجلس العسكري لإعادة الأوضاع السليمة إلى بلدنا الحبيب نعم سوف تأخذ وقت ولكن بمشيئة الله تعالي سوف تكون مصرناً جميلة وعظيمة بلد (الأمن والأمان)..

وبصراحة كنت أريد التحدث مع سيادتكم عن شيئ أرجو أن تسمح لي أخي الفاضل..
إلا وهو بعض ردودكم على المواضيع بكلمة أو أثنتين فقط وهذا لا نريده نريد أن نري وجهه نظر سيادتكم كي نتعلم من تلك الحياة وإن لم نتعلم من سيادتكم نتعلم من مّن أرجو أن تشرح لنا صدرك وتفيض علينا من آرائك الجميلة الجيدة..

أحمد الحريف

الاستاذالفاضل\احمد الحريف حاضر باذن الله ولتعلم بأن السبب فى تأخر الكتابة هو تزاحم الأفكاروالمعلومات وسط هذه الأحداث المتلاحقة بشكل لم يسبق له مثيل وعندما افكر فى الابنداء اخاف ان لا اوفى الموضوع حقه وقد تجدنى اهرب الى التعبير ببعض الأشعار لأننى اجد فيها اختصار غير مخل بما أود ان اقول ومع ذلك ساحاول ان اعبر عن بعض مما فى نفسى وهو كثير وكثير وعلى الله قصد السبيل
الدكتاتور العادل

واقرأوا دى كمان
Tuesday, 24 May 2011

يبقي انت أكيد فاهم غلط
البوست ده مكتوب بدون ترتيب للأفكار و بدون تحضير بس افتكرت شويت حاجات كده حبيت اوجهها لكل اللي رافضين النزول يوم الجمعة القادم 27 مايو و عايز أعرف رأيهم في الكلام ده
بس عندي طلب .. لو اقتنعت ابعت الكلام لصحابك اللي مش مقتنعين و لو مقتنعتش سيبنا نشتغل و متحبطناش و سيبنا نحلق بحرية

لما تشوف ناس ماتت قدام عينك و عارف مين اللى قتلهم و بقاله 4 شهور عايش حياته عادى جداً ... و انت مش فارقة معاك يبقي انت اكيد فاهم غلط؟
لما تعرف ان القناصة كانو بيتنقلوا في عربيات اسعاف و لسه مفيش حد لا من القناصة و لا من بتوع الاسعاف ولا وزير الصحة اتحاكم و انت قاعد و متكيف و مش نازل الميدان يبقي انت اكيد فاهم غلط

لما كل قتلة المتظاهرين لسه في اماكنهم و بياخدو ملايين و انت مش عايز تنزل يبقي انت اللي فاهم غلط ....

لما تقرأ كلام علاء الأسواني عن مقتل اللواء البطران في المصري اليوم و برضه مقتنع ان الشرطة و الشعب ايد واحدة .... يبقي انت اكيد فاهم غلط

لما كل مديرين الهيئات و الشركات الفاسدين بيقبضوا مرتبات خرافية و انت تيجي تطالب العمال ميعبروش عن حقوقهم و لو بيوم اعتصام يبقي انت اكيد فاهم غلط ....

لما يحيي الجمل عمال يحضر لحوار وطني كله من الحزب الوطني و بيعمل قانون للتصالح مع الفاسدين بدل ما يعمل قانون لمحاكمتهم سياسيا و انت قاعد في البيت متكيف ...... يبقي انت اكييد فاهم غلط

لما تعرف ان قيادات الداخلية كل اللي حصلهم بعد الثورة انهم غيروا أماكنهم ..... يبقي انت اكيد فاهم غلط

لما تروح ماتش للاهلي ولا الزمالك و تلاقي 50 عربية امن مركزي في الاستاد -بدون مبالغة- و في نفس الوقت مفيش توكتوك حتي يروح مع مامور قسم الموسكي وكل البلد و الاعلام الوسخ يمسكوا في شجاعة المأمور و يسيبوا المصيبة ديه ..... يبقي اكيد هما فاهمين غلط

لما تلاقي وزير المالية داير يشحت من خلق الله و احنا عندنا الصناديق الخاصة بس فيها مئات المليارات و في ناس بتقول فوق التريليون يحلوا كل مشاكل البلد و انت موافق اننا نشحت ...... يبقي انت اكيد فاهم غلط

لما تعرف ان وزير البترول الجديد قرر يرفع سعر الغاز الي 4 دولار و هو سعره 15 دولار و المصيبة ان البلد بتستورد بوتاجاز و في ازمة سولار في البلد و انت لسه موافق ومش عايز تنزل معانا ...... يبقي انت اكيد فاهم غلط

لما تعرف ان في الاف الشباب اتحاكمو عسكريا بسبب مواقفهم و انت موافق ..... يبقي انت اكيد فاهم غلط

لما تفضل مصدعنا بكلام ان البلد لازم تتمسك بقبضة من حديد و أول لما القبضة تقرب منك او من حد تعرفه تقول بلاش تنزل المرة دي ...... يبقي انت اكيد فهمتنا غلط

لما تعرف ان هيلاري كلينتون صرحت ان عائلة مبارك ليها ثروات في امريكا لم تحصر بعد و سويسرا لوحدها جمدت حوالي 2.8 مليار جنيه مصري و لسه الاتحاد الاوروبي و دول الخليج معرفناش عندهم كام و تيجي ماما سوزان ترجع للبلد 24 مليون جنيه وتاخد افراج و حضرتك تقولي سيب العدالة تاخد مجراها و القضاء نزيه ....... يبقي انت اكيد فاهم غلط

لما تعرف انهم كانوا افرجوا عن زكريا عزمي ولما لقو الناس في الشارع هتموت من الخبر رجعوا حبسوه تاني و قالك اصل لقينا ورقتين جداد هنحقق فيهم و انت لسه مش مقتنع ان ديه تمثيلية .... يبقي انت اكييد فاهم غلط

لما تقرير لجنة تقصي الحقائق يقول ان العادلي المسئول الأول عن قتل المتظاهرين .... و المشير يقول ان كان في أوامر بضرب المتظاهرين و اكيد الاوامر من مبارك و لسه متحاكمش بتهمة قتل المتظاهرين و الخيانة العظمي و تيجي انت تقول ان العدالة بتاخد وقتها ...... يبقي انت اكيد فاهم غلط

لما تعرف ان اعلام بلدك اللي انت بتصرف عليه قطع الحلقة عن بثينة كامل لمجرد انتقادها سياسات المجلس العسكري وانه مانع ظهورها في الاعلام و انت تقول مش مشكلة يبقي انت اكيد فاهم غلط
لما تعرف ان طلبة اعلام القاهرة اتفصلوا علشان طالبوا برحيل سامي عبد العزيز اللي قال ان الانتخابات في عهد مبارك نزيهة وكان بيطبل للنظام و تقول اللي يجي في الريش بقشيش ... يبقي انت اكيد فاهم غلط
لما تبقي المجالس المحلية اللي فيها فساد للركب بشهادة زكريا عزمي و كلها وطني لسه زي ما هيه ومتغيرتش و انت عامل عبيط و تقول كله بأوانه .... يبقي انت اكيد فاهم غلط

لما حركة المحافظين الجديدة تحتفظ بكوتة الداخلية زي ما هية و انت تقول معلش المرة الجاية نشوف الموضوع ده .... يبقي انت اكيد فاهم غلط
لما كل القوانين تصدر بدون مناقشات زي مباشرة الحقوق السياسية و قانون الاحزاب و فض الاعتصامات و انت ملكش رأيي و ساكت .... يبقي انت اكييد فاهم غلط

لما الجهاز المركزي للمحاسبات يتستر علي دولة فساد و يطلع بعد الثورة رئيسه يقولك انا معنديش عربية و مش لاقي الاكل و انت تصدقه و تقول يا حرام ..... يبقي انت اكيد فاهم غلط


لما النائب العام التابع لمبارك و اللي كان ملفات كتير قدامه بيحطها في الدرج و لغاية دلوقتي ده بيحصل - بلتمس العذر دلوقتي - و انت تأتمنه علي المحاكمات و كأن اللي خلقه مخلقش غيره و كأن استبداله بشخص اخر هيسبب مصيبة و انت بتنام مطمئن .... يبقي انت اكيد فاهم غلط

لما مصابي الثورة و اللي فقدوا عينهم علشان خاطر البلد اللي انت عايش فيها مش لاقيين علاج و بيتظاهرو قدام مجلس الوزاء علشان يتعالجوا و في نفس الوقت بيعالجوا حسني نفسيا و مقعدينه في مستشفي 5 نجوم و انت لسه مش عايز تنزل الميدان ....... يبقي انت اكيد فاهم غلط
لما المجلس العسكري يبرر احداث 9 ابريل بان ابراهيم كامل وراها و بعدها بشهر يطلع براءة و المجلس ميعرفناش مين السبب و انت مش عايز تعرف ....... يبقي انت اكيد فاهم غلط

لما المجلس يقول ان الاقتصاد انهار و يبعت للناس علشان يحل المشكلة الاقتصادية و تلاقي كل الناس اللي هناك حزب وطني و سامي عبد العزيز و الست أم برنيطه – بشهادة نوارة نجم – و يقنعوا الناس ان احنا هنفلس و تاني يوم كل خبراء الاقتصاد الوطنيين زي أحمد السيد النجار يقولوا ان الاقتصاد لم ينهار و انه زي ما هوه و انت تصدق بتوع الوطني .... يبقي انت اكيد فاهم غلط

لما يفلقوا دماغنا بالسياحة و هما سايبين المخلوع في شرم واقف حال السياحة و مقعد الناس في بيوتها من غير شغل و انت لسه مصدقهم ..... يبقي انت اكيد فاهم غلط

لما مايكل نبيل يكتب مدونة - لا هتودي ولا هتجيب - في انتقاد المجلس العسكري و يتحاكم عسكري و ياخد 3 سنين سجن مشدد في السجون الحربية و انت متتعاطفش معاه حتي و تقول يستاهل .... يبقي انت اكيد فاهم غلط

لما المجلس ميبررش اللي حصل في المتحف من تعذيب و اختبارات كشف العذرية للبنات و ميفتحش تحقيق في الموضوع ده و انت عامل عبيط .... يبقي انت اكيد فاهم غلط

لما يبقي اول ظهور قوي للداخلية في احداث السفارة و يبقي بغرض الانتقام بشهادة كل المتواجدين في المكان و منهم محمد عفت و انت تقول اصل مش وقته المظاهرات قدام السفارة .... يبقي انت اكيد فاهم غلط

لما تعرف ان اللي بيدير مؤتمر الحمار الوطني و الوفاق الوطني اللي هيحددوا ملامح للدستور القادم و سياسات الوزارة في الفترة اللي جاية هما عبد العزيز حجازي و يحيي الجمل اللي عندهم 80 سنة و تابعين للنظام الفاسد و تعرف كمان ان اغلب المدعويين حزب وطني ومحرضين علي قتل المتظاهرين و تعرف ان شباب الثورة و 6 ابريل هددوا بالانسحاب و تاني يوم انسحبوا فعلا و كل ده ميحركش فيك اي حاجة ..... يبقي انت اكيد فاهم غلط

لما تعرف ان في تونس منزلوش ولا مظاهرة بعد هروب بن علي و انهم دلوقتي حالتهم تصعب ع الكافر و محتاجين نفس الجرأة بتاع أول مرة علشان ينزلوا تاني و انت مش عايزنا ننزل ..... يبقي انت اكيد فاهم غلط

لما تعرف ان كل حاجة المجلس العسكري نفذها كانت تحت ضغط المتظاهرين يوم الجمعة من وزارة شفيق لي حل أمن الدولة اللي غيرو اسمه و ضحكو علينا لي محاكمة رموز النظام اللي طلعت وهمية و انت برضه تقولي مش لازم ننزل يوم الجمعة ..... يبقي انت اكيد فاهم غلط

لما يبقي اغلب الناس مقتنعة بالمجلس الرئاسي و نلغي فكرة المطالبة بيه علشان حضرتك تنزل معانا و برضه مش عايز تنزل يبقي انت اكيد فاهم غلط

لما تعرف ان ظباط الامن الوطني ( امن الدولة) رفض الاشراف القضائي علشان يرجع يمارس سفالته تاني معانا و انت مش فارقة معاك ...... يبقي انت اكيد فاهم غلط

لما تلاقي لعيبة الكورة لسه عايزة ملايين و تلاقي الفنانين اللي خانو جمهورهم و نافقو النظام بياخدو ملايين و انت تقول بارك الله في ما رزق يبقي انت اكيد فاهم غلط

لما تعرف ان كل رجال الاعمال مش بيدفعوا ضرائب و ان الموظفين فقط هما اللي بيدفعوا ضرايب و انت ساكت .... يبقي انت اكيد فاهم غلط

الحياة بسيطة.. ياللي شايف إن نزول التحرير غلط, إتفضل أقعد في بيتك.. الناس اللي شايفة ان الثورة محتاجة لهم هاينزلوا, حتى من غير دعوات.. لو خايف على العجلة بتاعة الإنتاج! التظاهر يوم جمعة! خايف من المجلس الرئاسي, مفيش! زعلان ع الإستفتاء, كلنا نحترم الإستفتاء ونتيجته! نازلين للحق والعدالة ودم الشهدا اللي مش هايضيع طول ما فينا نفس! نازلين نكمّل الحلم! نازلين نقول المصري مش هايطاطي تاني لأى مخلوقٍ كان! عندك مشكلة مع ده؟

انا مكتبتش عن المجلس العسكري زي كل الناس انا كتبت كل اللي في قلبي ... يطلع بقي السبب فيه المجلس العسكري يطلع الوزارة ... تطلع أمي ... انا مليش دعوة انا نازل و خلاص
دي الحاجات اللي افتكرتها و لسه فيه غيرها كتير يا ريت تزودوها انتم
حسبي الله ونعم الوكيل في الظالم و ابن الحرام ... حسبي الله و نعم الوكيل في اللي مش عايز البلد دي تنضف

أنا خلصت كلامي و متأكد ان فيه ناس مش هتفتنع برضه و هتقول ان انتم عايزين تخربوا البلد....

منقول من هوايت نايت

ده فيديو محمود سعد و مكالمة مصعب اكرم الشاعر

إلى أعز الناس إلى قلبى دكتور الدكتور العادل ليست هذة هى المرة الأولى الذى أقرأ فيها أشعر كنت أكثر الأحيان أسمعها منك بأذنى فنحنوا متفقين منذ أكثر من ثلاثون عاماً على كل شىء لكن عندما جلست معك وتحدثنا عن الثورة واقنعتنى حقيقياً بانها ثورة بيضاء ليس عليها غبار أقتنعت منك مبدئين بذلك لكن فى ظل هذة الأيام أسمح لى بأن اقول لك بأنها أصبحت هوجه وليست ثورة كما حدثتنى لان الثورة الحقيقية لأبد أن يكون لها قائد فعندما تكون من غير قائد فنسميها هوجه ولا تقول لى بأن قائدها هو الشعب كله لدى كلام كثير جداً لكن لضيق وقتى اكتفى معك بهذا حالياً وأرجو أن تكون فهمن معنى كلامى

المشكله في الشعب نفسه لان للأسف الشعب اغلبه او معظمه جاهل والجهل هنا جهل في كل شئ
حتي المتعلمين جهله لان لايوجد في مصر تعليم اصلا
فعمر ما شعب يبقي جاهل ويفهم يعني ايه حريه
فمعظم الشعب اهم شئ عنده هو الاكل والشرب فقط
فتأكد سيدي الفاضل عندما يصبح اولويه الشعب هي الحريه والكرامه ثم يليها اي شئ اخر
فتأكد انه تحرر من الجهل ويستحق الحريه والكرامه علي حق
وساعتها هتلاقي كل ميادين وشوارع وحواري مصر نازله فيها الناس وليس ميدان التحرير فقط..

فاطمة فيصل

الاستاذ الفاضل الدكتاتور العادل ما كتبته او نقلته لنا من بعض المواقع رائع ومقنع تماما لكن ارجو ان يتسع صدرك لمن هم مثلى ام اخشى على بلدى التى هى امى وام اولادى اولا انا بحثت عن معلومات عن نوارة نجم وبلال فضل حتى اعرف من هم او ربما ظننت انى استطيع ان اقرا ما وراء السطور ووجدت فيهم النقيضين تماما المهم فكرت وقتا طويلا وسالت نفسى ما ساساله لحضرتك الان ما الفائدة من محاكمة رجل تخطى الثمانين من عمره او اعدامه نحن نقتص لقتلانا نعم ولكن هل نقتص للشهداء لو لم يتنحى مبارك وفعل بنا كما يفعل القذافى كنا الان مازلنا نفقد اولادنا من اجل الحرية والحمد لله شاء الله ان ينزع الملك ممن ظلمونا سنين فلما لانقف ونصلح ولما لاناخذ اموال شعبنا ما العيب فى ان يرد مبارك وعائلته كل ما نهب من ثروات الوطن اما دماء الشهداء فلنحتسبها عند الله ولا اظن الله مضيع حق احد فهيا نبنى بلدنا التى اصبحت مشتته وكل واحد فى وادى فلما لانوحد الصفوف والهمم ونمشى فى طريق واحد طريق الاصلاح ولتكن اعيننا مفتوحة حتى لايدخل بيننا من يفرقنا من جديدوايضا اسال اليس من المفروض ان يكون هناك ممثلين عن الثورة يتابعو الاخبار ومحاسبة الفاسدين دون كلل او ملل او انسحاب من المفاوضات ويكون لهم طرقهم الخاصة فى ابلاغ الشعب كل ما يجرى من خلال مواقع نت او جرائد معينة او حتى قنوات مصرية بدلا من النزول للشواع والميادين التى يختلط فيها الحابل بالنابل يعنى مفيش رؤوس معروفة للثورة نفهم منهم ويسمعوا مننا بدل ما كل شخص يكتب عن الثورة يجبنا شمال وواحد تانى يجبنا يمين وبعدين مش لازم يكون فيه اولويات للاصلاح فى بلدنا بدل ما كلنا ملهيين مع المسحيين والمسلمين شوية وننزل ولا مننزلش شوية وناس تانية مستغلة اللخمة الى الجيش والشعب فيها وبتستغل كل شبر فى البلد لمصلحتها الشخصية زى المبانى العشوائية التى خنقتنا فى المطرية مثلا يعنى الخلاصة انا نفسى البلد تستقر ونحاسب فعلا كل واحد فى البلد دى بس اولهم الى استغلوا الثورة وتعب الناس وكانهم مش من البلد دى والنهاردة احنا مش عارفين مين الى هينزل الميدان مع اولادنا وبناتنا ممكن يكونوا من الناس الى كتبت عنهم الاستاذة فاطمة فيصل فى المؤامرة المبلغ عنها اومندسين من اى احد فى اى جهه فى اى بلد من اى اعداء ونفقد لسه ابناء منعرفش مين الى قتلهم ساعتها حنحاسب ونعدم مين

أختي العزيزه \الاستاذه هبه
اني اختلف معاكي في الرأي واكيد تعلمين ان الاختلاف في الرآي لا يفسد للود قضيه
عندما نتحدث عن مبارك لا نتحدث عن رجل مسن بلغ من العمر ارزله
بل نتحدث عن رئيس مصر حتي اربعه اشهر مضت وكان مازال متمسك بالحكم حتي اخر رمق في حياته
أي هو لم يراعي كبر سنه ولا اشتكي انه قد كبر من قبل وان الحكم عبئ عليه
اذن فهو مسئول عن كل شئ حدث في مصر ابتداء من اول حكمه حتي قتل حوالي ألف شاب من شباب مصروكان لا يتواني ان يسوي ميدان التحرير بما فيه من ألوف او ملايين وهذا علي لسان بعض القاده بالجيش المصري العظيم
فأي شئ من أجله ان نتخلي عن حق دماء ابناءنا وقد قال الله تعالي من قتل نفسا كانه قتل الناس جميعا
واي نقود هذه التي من أجلها نتخلي عن هدر كرامه شعب باأكمله خلال ثلاثون عاما
فنحن اختي الكريمه لم نقوم بثوره من اجل النقود فمصر غنيه بابنائها وبخيراتها دائما
فنحن ثورنا من اجل الحريه والكرامه فقط اما النقود فمصر منذ 7 ألاف سنه فهي بتتسرق ومازال بها خير بكرم رربنا علي شعبها
ولو تكلمنا علي انه سنه كبير فامامنا مثل حاضر الان مدير صندوق النقد الدولي بيحاكم وهو فوق السبعين من عمره بسبب تهمه تحرش بفتاه ولم نسمع احد في العالم كله يقول انه كبير بالسن ولا يجوز محاسبته علي فعله صغيره كهذه امام افعال مبارك بالبلد وأمر قتله للشباب
اختي الكريمه لو سئلتي ام اي شهيد هل تأخذين اموال الدنيا جميعا وتعفي او تتغاضي عن محاسبه مبارك
فماذا سيكون ردها ؟
انا سوف اضع نفسي مكانها لان فعلا كل شاب استشهد في الميدان اعتبره ابنا من ابنائي
فاقول ولا كنوز الدنيا تعوضني عن ضفر من ابني

فاطمة فيصل

السلام عليكم
الاخوة الكرام الاخوات الفاضلات
اولا انا مع محاكمة حسني مبارك جنائيا عن كل قطرة دم سكبت خلال ثورة 25 يناير سواء من الشباب الحر المصري الذي خرج لينادي بحريته وبالعدالة الاجتماعيه وايضا من رجال الشرطة الشرفاء الذين ماتوا دفاع عن اماكن اعمالهم وخاصه اقسام الشرطة ولاننا يجب ان نفرق بين المصري الذي ذهب لميدان التحرير والميادين العامه بكل محافظات مصر والمصري الذي ذهب ليحرق او يسرق قسم الشرطة فهذا لم يكن من ضمن الثوار بل هو شخص غير وطني ذهب ليسرق او يحرق وبالتالي وجد امامه رجال الشرطة فاراده ان يفتك بهم فما كان امام رجال الشرطة اللا الدفاع عن انفسهم ولكني مع محاكمه اي رجل شرطة قتل او جرح اي مصري كان بميدان التحرير او اي ميدان اخر ولهذا يجب محاكمه حسني مبارك عن دمائهم الزكيه لانه كان يمكنه منع قتلهم اذا استمع الي صوت العقل وتنحي او علي الاقل اقال حكومة نظيف او حتي اقال حبيب العادلي ولكن شهوة السلطة والغرور صور له انه يمكنه القضاء علي المصريين وذلك ليس من اجل مصلحة المصريين بل من اجل مصلحته هو ومصلحة ابنه وزوجته عليهم لعنه الله
ثانيا يتم محاكمه حسني مبارك جنائيا ايذا عن دماء المصريين التي اريقت علي الطرق التي انشئت مخالفة للمواصفات نظرا للفساد الرهيبه الذي كان يسرق كل شئ وايضا الذين ماتوا بسبب السرطان الذي انتشر بصورة رخيبه في عصر مبارك الزاهي او الذين ماتوا غرقا لركوبهم عبارات لاتصلح اللا لنقل المواشي وليس ابناء الشعب المصري الطيب
ثالثا يجب ان يحاكم جنائيا بتهمه الخيانه العظمي لانه اضر بمصر وباعها واركها امام ارجل الامريكان واليهود
وللعلم هناك الكثير والكثير الذي يحتاج الي مجلدات عديدة لذكرة
واقول للاخت هبه الله اذا كان احد اخواتها او احد اقربائها قد مات او جرح اثناء احداث 25 يناير فهل كانت سوف ترضي بالعفو عن حسني مبارك وتقول المسامح كريم ؟
واخيرا باذن الله سوف تتم محاكمه مبارك والقصاص منه حتي يكون عبرة لاي شخص يتولي حكم مصر في المستقبل ويعلم انه اذا اخطا او اضر بشعب مصر فمصيره المحاكمة والقصاص والا فانه اذا عفونا عن مبارك فان اي شخص يسرق ويقتل فسوف يقوم بذلك بدم بارد ليه لانه يعلم انه في اخر الامر سوف يقول اسف ماكنش قصدي وعليه فسوف نعفو عنه والمسامح كريم
اعتذر عن الاطاله

السلام عليكم اختى وحبيبتى فى الله الاستاذة فاطمة شكرا للرد وطبعا كما قلتى الاختلاف فى الراى لايفسد للود قضية وربنا ميجبش اى اختلاف او خلاف الاخ الفاضل الكابتن اشرف انا معكم جميعا فى محاسبة مبارك ولكن ما اريده هو ان لا تكون هذه هى الاولوية فبالامس كان الرحيل والتنحى والان الاعدام طب وبعدين كل جمعة نزول وغضب متى سنعمل ونصلح البلد التى كل يوم حالها فى النازل وبعدين مين له سلطة لمحاكمة مبارك والبلد كل الى فيها استقالوا او فى السجن مين الى بيحكم البلد الان اصغر واحد فى الشارع بيقول مفيش حكومة والجيش بالبلدى كدة متبعزق فى كل حتة زى مايكون بيجرى وراء شوية عيال وحضرتك شايفة الحال امتى ننتهى من كل دة لما نعدم مبارك ولا ايه الاولوية واين راى دكتاتورنا العادل الم يكن بالامس فى التحرير فما رؤيتة من كان هناك وما اهدافهم وبما شعر وهو هناك

الاخت الفاضلة\هبة الله
فوجئت بمعرفتك اننى كنت فى التحريرامس برغم الشمس الحارقة والزحام الشديد ومرض جسمى الذى تخطى الستين وكل ذلك لا يمثل شيئا امام معاناتى النفسية الشديدة من كل ما يحدث الان وما لا تعلمينه يا سيدتى الفاضلة اننى امس فى الميدان لم اتمالك نفسى من البكاء الشديد برغم صلابة تبدو فى نفسى وبرغم شيخوختى كنت اتمنى ان ترحمينى من ذكر ذلك الا ان اصرارا عجيبا منك ومن طائفة بدأت تتزايد بشكل مفزع فى الفترة الاخيرة بدأت بقصد او بغير قصد تنقلب على ثورة هى بكل المقاييس من اعظم الثورات فى تاريخ العالم وانا متأكد تماما ان من قصد او من لم يقصد هو لا يعرف مطلقا معنى كلمة ثورة الثورة يا سيدتى الفاضلة تعنى فى ابسط المعانى هى انتفاضة الشعب بغرض التغيير الشامل والفورى لوضع يراه الشعب وضعا فاسدا لا يحقق طموحاته فى العدل والحق والسلام وعليه قام الشعب الاعزل مطالبا بالتغيير وعرض شباب هم دون ادنى شك من خيرة ابناء هذا الشعب عرضوا حياتهم للخطر من اجل هذا التغيير المنشود لصالحك انت وانا ومستقبل اولادنا حتى يعيشون كباقى خلق الله فى بلاد تحترم ادمية الادميين وهنا اسألك السؤال هل تحقق هذا التغيير المنشود حتى نقول للثورة شكرا انتهى الموضوع هيا ايها الثوار المنتصرون عودوا الى البيت حتى نبدأ الامجاد وهنا اذكرك بالمقولة الرائعة ان الثوار الذين يقفون فى منتصف الطريق يحفرون قبورهم بأيديهم فهل يا سيدنى الكريمة تريدين لنا ان نحفر قبورنا بأيدينا؟ الثورة لم تنتهى بعد بل هى قد بدأت فقط وانتم بقصد او بدون قصد تريدون وأدها فى مهدها او انكم لا تعرفون حتى الان معنى كلمة ثورة
تتكلمين عن الأولويات واولى الأولويات فى اى ثورة على حد علمى هو سرعة القبض على رأس النظام السابق للثورة وكل اعوانة واذنابه دون اى استثناء ومحاكمتهم جميعا بعدالة ولكن بسرعة حتى لا تترك الفرصة للعقارب والثعابين ان تخرج من جحورها فتقتل من ثاروا عل اسيادها الذين لطالما امدوهم بالدفئ والدسم
يا سيدتى الفاضلة بربك هل رأيت ثورة تقوم للقضاء على حاكم ثم يظل فى نفس موفعه الذى كان يقيم فيه بصفة دائمة قبل الثورة هل هذا هو التغيير من المؤكد ان استمرار هذا الوضع لمدة يوم واحد بعد اى ثورة هو خطة لئيمة لاحباط الثورة وهل نسيتى يا سيدتى ان فى القصاص حياة لاحظى حياة وليس موت كما تصورين انت لنا
تلك اولوية اولى لم تتحقق
ثم تقولين وبعدين كل جمعة نزول وغضب متى سنعمل ونصلح البلد التى كل يوم حالها فى النازل اولا انت ترين بام العين كيف لا تصدر بعض القرارات الاصلاحية الى حد ما الا بهذا النزول الى الميدان الذى تطلبين انت منا ان نوقفه فهل انت ضمنيا تريدين عدم اصدار اى قرارات اصلاحية جدبدة وبارك الله فيما رزق وحطوا حصوة ملح فى عينكم ايه الطمع ده؟انتوا هتنهبو؟
وهل اجتماع عدد محدود فى ميدان هو المعطل للعمل فى بلد مساحتها مليون متر مربع ام ان عدم تحقيق العدل وعدم التطبيق الصحيح لقواعد العمل والتنمية والاخلاص واصلاح التعليم والتدريب والتثقيف و التخلص من كل المعوقات هو الذى يدفع لعودة العمل الجاد المخلص لاعادة بناء بلد دمر بالكامل وبالقصد الجنائى على مدى سنوات طويلة ولم يدمرة شباب واعى مثقف مؤمن تظاهر فى ميدان التحرير
وتسألين عن من يحاكم مبارك والبلد كل اللى فيها استقالوا او فى السجن وهذه مبالغة شديدة لأن من ما زالوا يسنحقوق الدخول الى السجن هم على اقل تقدير مئة ضعف لمن هم بداخله الان مع ملاحظه ان شكل المحاكمات التى تحدث الان تذكرنى بمسرحية لمسرح العبث واحنا موش هانبيع عقولنا لأتها ببساطة هى الشى الوحيد الذى نملكه الان نعم يحاكمه الشعب ياسيدتى ممثلا فى من قبلوا ان يمسكوا بسدة الحكم الان فى مصر اذا اخلصوا النيه واستعانوا بمن يفهم فى مثل هذه الامور وهم كثيرون فى مصر بحمد الله
وساطرح لك حلين فى مشكلة المحاكمة وفزاعة استعادة الاموال المنهوبة والمهربه فى الخارج الحل الأول وهو الاسرع والاضعف انسوا موضوع الفلوس وحاكموهم محاكمة عسكرية سريعه جدا وسو ف تعود العقارب والثعابين الى جحورها ويختفى البلطجية الذين اطلقوهم ووعدوهم بعودة الامور الى ما كانت علية قبل الثور وبهذا الحل السريع يعود الامان والعمل وتغور الفلوس فى ستين داهبة ما البلد بتتسرق بقالها سبعة الاف سنه وربنا بيعوضعها تانى من اجل الكادحين المخلصين المؤمنين وعلى فكرة كل ديون مصر وكل ما تحتاجه مصر من فلوس للتنمبه موجودة وبأضعاف قيمتها فيما يسمى بالصناديق وداخل مصر وده موضوع اخر اما الحل الأمثل فهو السير فى المحاكمات فى اتجاهين فى نفس الوقت محاكمه مدنيه عادله حياديه غير حكومية حتى اذا تمت نستطيع بها استرداد الاموال والمحاكمة الثانية محاكمة جنائية لقتل الشعب قبل وبعد الثورة ودى حق داخلى لاى بلد لا يستطيع اى بلد اخر الاعتراض عليه وتكون عسكرية وسريعه ولاحظى ان الشباب الذى تظاهر امام السفارة الاسرائيلية حوكم عسكريا وحكم عليه فى يومين اثنبن ولم نرى اى اعتراض داخلى اوخارجى
يا سيدتى الفاضلة التباطؤ فى الظروف الاستثنائية تواطؤ يؤدى الى كل ما تشكين انت منه الان وليس ميدان التحرير وحتى لا اطيل علبك فهناك كتب سوف تكتب فى كل ما حدث
اقرأى قصيدتى مرة ثانيه وارجوك لا تجعلينى ابكى مرة اخرى فى ميدان التحرير
الدكتاتور العادل

السلام عليكم ورحمة الله وبركاته

أريد أن أتحدث إليكم أخواتي وأخوتي حديث مختصر إلا وهو:
أولاً: حسني مبارك رجل عسكري أي من المفروض أن يكون منضبط.
ثانياً: حسني مبارك وصل لسن كبير أي من المفروض أن يكون حكيم.
ثالثاً: هو من أعطي أوامره أو غيره بضرب المتظاهرين من الشرطة والجيش وأمتنع الأخير من ضرب الشعب وكانت الشرطة هي من تعدي على الشعب بالضرب وقد أستشهد من أستشهد وكان العدد فيما يقولونه ما يقرب من الألف شهيد وكثير من المصابين.
رابعاً: أفرضوا لو الجيش ضرب الشعب هو أيضاً فما رأيكم كم يكون عدد الشهداء وكم عدد المصابين.

حسني مبارك وزوجته وأولاده وأقاربه وكثيراً من النظام وفلوله عايشين في عزبه وموزعين على أنفسهم كل شيئ ويخرج حسني إلى الخارج يشحت لمصر من أكثر من دولة عربية ولكن بدل ما يضع تلك المبالغ والهدايا أشكال وألوان لصالح مصر كان يضعها لمصلحتة الشخصية هو وباقي ما ذكرناه أعلاه.

ماذا يساوي المال مقابل الروح..

هذا ولكن ماذا تعرف عن المتع الخاصة بهؤلاء الأفراد من متع الحياة .. وعندما يبدأ حسابهم على ما أقترفوا في حق هذا الشعب تظهر رؤوس تطلب الرحمة - لا يصح ولا ينفع أي شفاعة لهؤلاء لإنهم مازالوا لا يرغبون في الإستسلام ومازالوا يحاولون عرقلة مسيرة الدولة وإعاقتها ويحاولون المستحيل كي لا تنجح الثورة..
أين نحن.. من كل هذا

أرجوا أن أكون أوضحت القليل من الكثير..

أحمد الحريف

اخى الفاضل الاستاذ\احمد الحريف
اذا كنت قد قرأت ردى على الاستاذة\هبة الله فهل انا اجبتك على ما تود منى ان اكتبه فى مقالة مفصلة ولو قليلا بدلا من الكلام المقتضب منى كما ذكرت انت سابقا
وللعلم انا اهتم بكل كلمة تكتبها
الدكتاتور العادل

استاذى الفاضل الدكتاتور العادل آلمنى كثيرا ان اكون السبب فى انهمار دموعك مرة اخرى فسامحنى لقد كنت احاول ان افهم ما نحن فيه من اوضاع مؤلمة وحزينة ولم يكن هناك حل غير المناقشة بالراى والراى الاخر حتى استطيع ان اقف على وجهة نظر محددة واعرف اين انا وما استطيع تقديمه لبلدى ولو بالدعاء وحضرتك ساعدتنى كثيرا فجزاك الله خير وكل من اشترك معى فى المناقشة بصدر رحب وفعلا لقد رايت قرارات مهمة وخطيرة يوم السبت وشعرت بتراخيها يوم الاحد فمعك حق لابد من اتمام العمل كما قال رسولنا الحبيب ان الله يحب اذا عمل احدكم عملا ان يتقنه
فالله المستعان وليلهمنا الصبر على ما نحن فيه

اثمن شعورك النبيل نحونا جميعا واضم صوتى لك بالدعاء لعل الله ان يتقبل منا لأجل ناس طيبين من أمثالك
الدكتاتور العادل