صباح الخير يامصر

شوية فول مدمس بزيت تموين...

وقرن فلفل ومعاهم رغفين...

تاكلهم تحس بصهد فى ودانك...

وتخيلات متعرفش جايه منين...

تجرى تطفى النار بكوز ميه...

والله مافارقه زير من حنفيه...

وتكريعه زلزال صحه ياهريدى...

ناقصك ياواد شاى حبر وصعيدى...

كافيتريا الغلابه عباره عن حجرين...

على أقرب رصيف البشر قاعدين...

أم سيد كافيه مين ميعرفهاش...

أسأل عليها التكسجيه والسواقين...

القعده حلوه والكل عمال يدش...

كوره وسياسه معانا مبتفرقش...

تسمع نشرة الأخبار مع وصف تفصيلى...

وفلان اللى هرب بره وصاحبه اللى نازل هبش...

خلصت شايك أحمد المولى...

نهارك جميل ودنيتك حلوه...

وقبل ماتمشى سلامنا للأخوه...

وصباح الخير يامصر وعليكم يامصريين