رأى الدكتور الشاعر صلاح عبدالله فى الانتخابات

التعلب فات فات، رشح نفسه فى الانتخابات

التعلب جى يفسخنا

وبإيده الوسخة يوسخنا

التعلب عايز يمسخنا

ولا نبقى ولاد ولا نبقى بنات

التعلب فات

التعلب جى يعيد زيفه

لجل يمشينا إحنا بكيفه

عايز عنتر يرهن سيفه

ويقف فى العتبة بسنتيانات

التعلب فات

التعلب جى يهددنا

لجل بإيدنا نكتف إيدنا

نفسه بإيده يغتال عيدنا

والعيد يتوفى ويبقى رفات

التعلب فات

التعلب بجنيه ورصاصة

جاب البلطجى والرقاصة

وإحنا يا عينى لبسنا الطاصة

على إنها تاج سنوات سنوات

التعلب فات

التعلب جى بشكل يخض

بالرشوة ساعات وساعات بيعض

لو قال لك مرة فى عمرك خد

فى بقيت عمرك هايقول لك هات

التعلب فات

هايصلى عشان يلعب بينا

دا فى دينه على مذهب دينّا

بيحج يا دوبك فى مارينا

ما هى أقرب من مكة وعرفات

التعلب فات

يا فلوس تتوزع زى الرز

يا مطاوى تشرح ناس وتغز

خلونا نقول للتعلب طز

لا طمع ولا خوف يملونا سكات

التعلب فات

ما التعلب فيها بقى له سنين

طرحت لنا إيه إلا السكاكين

بين ناس أموات لكن عايشين

وبشر عايشين لكن أموات

التعلب فات

والتعلب لجل يفتفتنا

كان جى مراهن عالفتنة

واتغاظ لما الدنيا شافتنا

أحباب، وصحاب، وجيران، واخوات

التعلب فات

جى يركبنا الأفشوخة

لجل نعيش العمر فى دوخة

تعلب بعواطف مسلوخة

يتمنى نعيش دايماً فى شتات

التعلب فات

لو جيت متخفى بألف قناع

مش ممكن راح ننسى الأوجاع

ولا حرقة مصرى عطش أو جاع

ولا مصرى من إهمالك مات

التعلب فات

التعلب جى يطفى النور

ويزيد كسر القلب المكسور

فى ضميره يا عالم عنده ضمور

وفى أطماعه عنده التهابات

التعلب فات

والتعلب كافر بالكلمة

حيلته يادوبك سكاكين تلمة

سمسار رعب وسمسار ضلمة

بيخاف م الندى والنور بالذات

التعلب فا ت

يا فلول بفلوس وفلوس بفلول

ولا إنتو الروس ولا إنتو ديول

إنتو السل فى جسم المسلول

أوله كام كحة وآخره موات

التعلب فات

لا إنتو الشعب ولا إنتو حكومة

إنتو يادوبك صوت البومة

إن كان حزبكو أحلى عزومة

تبقى اتاكلت وانتو الفضلات

التعلب فات فات

د.صلاح عبدالله